ZARHKEL VOI (27) NAK ZARHPI NI 

Voikhatnak Bible - Habakuk 1:2-3, 2:2-4

Psalm - 95:1-2, 6-9 (Lehnak 95:8)

Voihnihnak Bible - 2Tim 1:6-8, 13-14

Thawngṭhabia - Luke 17:5-10 

RUAH DING TETE HNA

1. Pathian rianṭuan tu Habakuk le Timote i harnak an ton mi le lungretheihnak kong fiang deuh in chim ding. 

2. Paul nih Timote thaazaang a peknak kong. 

3. Jesuh Khrih zumh ti mi cu a cawnpiak mi vialte kha zeidang nak in i tleih deuh in pom deuh ding a si. Asullam cu amah cungah i bochan in, kan zeizong vialte amah sin chiah in a chim mi tuah ding kha a si. Jesuh kan zumh timi nih cun amah caah zumhtlak kan si ti kha a sawh. 

4. Zumhnak cu Pathian laksawng a si. A ṭhatnak le a dawtnak in a kan pekmi a si i kanmah tuah ṭuannak thawngin a si lo. Ahohmanh nih zumhnak hi ka taa a si tiah an chim kho lai lo. Hihi cu Pathian sin in a ra mi a si i minung zaapi ṭhatnak caah Pathian pekmi laksawng a si. 

5. Zumhnak cu thil man sunglawi ngaimi a si. Kan thlau sual ahcun kawl ṭhan ding a har tuk cang. Zumhnak cu mei kan kau mi bantuk a si i a mit sual lai tiah zohkhenh peng a hau, tuat peng, chem peng a hau. Nifatin zohkhenh peng a hau. 2 Tim. 1:6 ahcun "Cucaah na cung i ka kut ka rak chuan tik i Pathian nih an pekmi laksawng (zumhnak) kha na nunter pengnak hnga chimh ṭhan kan duh," a ti. 

6. Zumhnak cu a ṭhawng ngaingai mi a si. Pathian nih minung zaangdernak chungin ṭhawnnak a chiah mi a si, aa tordawr ngaingai a hau. Ruamkaihnak nih zumhnak a hrawh. 

7. Zumhnak i a theipar cu zungzal nunnak le nomhnak a si.
8. Tuchan Khrihfa mi nih kan i ralrin awk ngai a herhmi cu, zumhnak hi a ṭhawngtuk i a leer kho mi a si. Pingpa lo ah a kal kho tawn. Adik zumhnak le a palh zumhnak hei ti ko u si. Adik zumhnak nih cun pawrhlawt ruamkaihnak, nahchuahnak, pumsa duhnak, thisa leem soinak, etc ... ti bantuk vialte kha a thah dih i zawnruahnak, lungnemnak, thinfualnak, ngaihthiam khawhnak, tbk ... in a khaah tikah Jesuh lungtong mi ah aa chuah i zungzal nunnomhnak a si mi Pathian sunparnak chungah a luh ter.
9. Pathian nih minung a kan bat mi a um lo i minung tu nih Pathian sinah lei baa tampi kan ngei.