Bible chung i a langhmi Thlauk Fimnak

BIBLE CHUNG I A LANGHMI THLUAK FIMNAK

65. Biaknak lei nih cawnpiakmi sernak kong vialte kha chimṭhan ka duhlo i, vawlei pumpi le minung hna i pehtlaihnak kong Bible chung i cawnpiakmi ah zeitindah a langhter tiah biahalnak nan ngei kho.

            Genesis i hmasabik ah a langhter mi sernak kong ahcun minung ser dingin Pathian nih a tinhmi a hleikhun timtuahnak kha a langhter. Mipa le Minu kha a ser hnuah, Pathian cu a sermi thil vialte kha a zoh tikah aṭhatuk mi kha a rak hmuh (Gen. 1:33).

            Hi kong kha kan zoh tikah minung huham hi zeitluk indah a ngan ti kha theihkhawh asi. Minung cu thilri asilo i, minung pakhat asi ko. Minung cu amah kong amah nih atheihkhawh i, amah le amah aa uk, amah le amah zalongtein aa pekchanh khawh i, adang nunnak khat minung hna hawikomh khawhnak hna kha a ngei.

            Mithiang Pope John Paul II nih sertu Pa Pathian cu minung pakhat cio cungah a chiahmi ahleikhun a dawtnak ruangah mipa le minu kip cungah tahkhawh asilo mi minung huham ṭhawnnak kha a pek tiah a chim.

            Minung ṭhawnnak huham kha dingte le fektein khamhnak bia a chimmi hna cu Khrihfa biaknak zumhning ah annih an rianṭuan mi hna caah abiapi ngai mi konglam langhternak hna hmuhkhawh asi.

            Minung pakhat cio nunning cu hnok cemcum ningcanglo asimi hi vawlei ah vuanhter mi thil asilo, pulrin lo piin asang mi zong asi fawnlo, adong kholo i heer mi sinak zong in a langhter lo, Sertu Pathian cu mi pakhat cio kha hitin a kan tikhawh. Nangmah kha na nu pawchung i ser na sihlan tein Pathian nihcun an theih cang (Jeremiah. 1:5). Kannih cu kan nu pawchung ah a kan pawika tein Pathian thinlung ah kan rak umcang. Cucaah Pathian cu ṭha tein khua a ruat hnu ah mi pakhat cio kha a rak kan ser. Pathian cu mikip kha ser ding a timh i a dawt i ser asimi mikip cu Pathian caah a herh mi kan si dih.

66. Genesis ah a langhter mi sernak kong a langhternak ah minung umtu ningcang le tuanbia sining kha ca in phunkhat, lemcang sullam in phunkhat a langhter. Cu Bible thiang i a langhtermi ah minung hna thluachuah nung in umnak cu minung le Pathian hawikomhnak, minung le nunnak khat adang minung hna he hawikomhnak, pawngkam vawlei pumpi pehtlaihnak tiah ahram afek i a chung taktak pehtlaihin a fonhmi pehtlaihnak pathum cungah hram a bunhnak kong a langhter.

            Bible thiang nih a chimning in hi a nunnak tlukin a biapi mi pehtlaihnak zuunhri pahnih ningte cu a chung le a leng he a cat tiah a langhter. Hibantuk minung le kokek pawngkam hna i pehtlaihnak zuunhri a cahnak cu minung nih Pathian hmun kha airawlh in chuh duhnak le sermi thilnung saram hna i tahnak pakhat tiang lawng thil tikhawhnak kha fehter awk alnak hna ruangah asi.

            Hi konglam i hnuzulhtu thil a va si ahcun vawlei cung thap i thilnung saram hna cungah minung nih an chiahmi nawlngeihnak aana (Gen. 2:28) le vawlei kha an thuan an cin i zohkhenh kilveng dingin (Gen. 2:15) a hmuhmi ṭuanvo hna cu ningcanglo piin an si dih.

            Hnuzulh thil a vasiahcun, minung le pawngkam vawlei karlak ah ahramthawk tein a rak ummi aṭhami pehtlaih ikomhnak cu a hakmi umtuning ah a rak ithlen (Gen. 3:17-18).

            Asisi khuami mithiang Francis cu thilnung saram vialte he a rak hmuh tonmi pehtlaih ifonhnak cu ahramthawk in a rak rawkcang  mi lungrual funtomnak kha thlopbul ṭhanmi sinak in hmahthah awktlak asi kha kan hmuh.

            Mithiang Francis sinum asimi Mithiang Bonaventure nih a thimnak ah thilnung saram vialte he remnak a tuahnak thawngin Mithiang Francis cu vawlei hramthawk lio i ahramthawk tein rak hmuhcang mi aṭhami hawikomhnak umtu ningcng kha hmuhṭhan dingah aa zuamnak asi tiah a ti.

            Nihin vawleicung i a canglio mi thil umtuning cu a cunglei i langhter mi thil umtuning he aa hlat ngaingai. Nihin vawleicung ah raldohnak hna, ṭhihphaihnak phungtling le pakhat le pakhat sersatnak hna, sifah harsatmi, bochan awk ngeilo hna kha hlonhnak le pawngkam kokek kha dohnak hna ruang i mi nih an buarmi thil ṭhalo tuahsualnak hna cu hrawhnak thazaang tling cikcek in fiangtein an lang.

#Pope Francis i pawngkam he pehtlaihmi cawnpiaknak