I theih thiamnak

“Nannih Phungbia cawnpiaktu saya hna, nan caah ṭihnung a va si dah. Hngalhnak innka hunnak tawh kha nannih nih nan ken, nanmah cu nan lut duh ṭung lo i luh aa zuammi hna zong kha nan dawnh fawn ṭung hna,” tiah a ti. (Lk 11:52)

Minung hi nifatin thil pakhat khat kawl in a nung mi kan si. Cheukhat nih chawva an kawl, cheukhat nih theih hngalhnak le fimnak an kawl. Mah le mah sining ṭha tein i theih, i hmuh thiam zong hi fimnak pakhat a si. Mi tampi nih cu mah le mah i hngalh lo le mah si ning taktak i theih ding a ṭih mi zong tampi an um. Bianabia ah pakhat khat nih rak kan cawnpiak hna sehlaw, “ka theih ko, amah cawnpiak ka herh lo,” ti bantuk in um. Khakha kanmah le kanmah sining i theih ding kan ṭih caah a si. Kan zaangdernak kha midang hna nih thei hna hlah seh ti kan duh caah a si. 

Cun pawngkam ummi hna kong ceih le thangchiat chim lengmang zong hi mah dernak kha thuh duh ruangah a si kho fawn. Midang hna nih miṭha tiin ka ruat hna seh timi duh ruangah i pheh khi a si ko. Ahohmanh nih kan zaangdernak an chimmi kha theih kan duh men lai lo. Mah sining theih ding kan ṭih caah a si ko. 

Jesuh Khrih nih Farasi mi hna le Phungbia cawnpiaktu saya hna kha an sining le an lungput ning konglam he pehtlai in cawnpiak hna, a chimh hna tikah an rak cohlaang duh lo. Kan nih hna nih teh a kan hruaitu hna le Pathian bia in a kan cawnpiaktu, thazang a kan petu hna chimmi bia hna kha ngaih in kan zul tawn hna maw? 

“Ka palh” tiin mah le mah palhnak i cohlaan thiam zong hi fimnak pakhat a si. Fimnak hrampi a simi Pathian sinah fimnak kan hal zungzal a herh ko. Solomon Siangpahrang nih Pathian sinah “a chia ṭha thleidan thiamnak fimnak” a hal bangin kan nih hna zong nih sual-palhnak lam a kan panh tertu thil vialte hna kha hrial thiamnak fimnak Pathian sinin kan hal zungzal ve ding a si. Mah le mah palhnak le sining hna kha i thieh thiam lawngah Pathian cawnpiak nak hna le a kan ngeihpiakmi programe hna kha kan theih thiam lai i kan cohlaan thiam hna lai.