ZARHKEL VOI (29 )NAK ZARHPI NI 

Voikhatnak Bible - Ex.17:8-13

Psalm - 121 : 1- 8 (Lehnak 121: 2) 

Voihnihnak Bible  - 2Tim 3:14- 4:2

Thawngṭhabia - Luke 18: 1-8 

RUAH DING TETE HNA

1. Khrihfa vialte kan nunnak hi zei he dah aa lawh ti ahcun Bible hlun chung i Israel pawl Pathian nih bia a kamhnak, hmunthiang (holy land) ah an kal lio he kan i lo. Saalak le ral lakah, harnak phun zakip lakah an i tinhmi hmunthiang phanh dingah an kal cuahmah. Kannih vialte zong Pathian kamh mi vanram phanh awkah kan nun chung kan kal cuahmah ve ko. 

2. Tinhmi hmun phanh awkah zeidah a herh?

- Nunchung khual tlawnnak ah a herhbik mi cu hriamnam ṭha a herh. Kan nih kan hriamnam ṭhabik cu thlacamnak a si.

- Kan ton hngami kan ral ṭhawngbik cu kan thlarau a that hnga dingmi porhlawt ruam kaihnak, hakkauhnak, dawtnak ngeihlo nak, pumsa duhnak, tbk .. hna kan ral nganbik an si. 

3. Moses nih a baan a hler i thla a cam chung poah cu Amalak mi an sung thluahmah, a baan a thlak cun Israel mi an sung thluahmah ve. Asinain Josuah le Hur nih zanlei nitlak tiang Moses baan an doh piak tikah Israel nih a tei hna. Chimduhmi cu donglo in thlacam zungzal a hau. Ralteinak ding caah raltuk zong a hau i thlacam zong a herh tinak a si. 

4. Pathian sinah dong lo in thlacam zungzal a hauh bantuk in rianṭha ṭuan zong a herh ngai ve. Thlacam tikah zeitin dah thla kan cam lai ... 

- Thlacam tikah Pathian duhning cam le a duhlo ning cam ti a um. Pathian duhlo ning thlacam ti mi cu, mah duhning, mah siarem ning, minih thlacam a thiam ka ti hna seh tiah saupi thlacam, Bible chung Jesuh cawnpiakmi thlacamnak cu hlonh cam ti lo te hna kha a si.
- Pathian duhning cam cu, Jesuh a cawnpiakmi ningte cam le chapchih na duh ahcun, thinlung ṭhumh, tangdornak nganpi he cam kha a si. 

5. Acheu Khrihfa pawl nih cun camhmun cam lengmang ko le chimcia chim lengmang baihaat in thlacam cu san a tlai lo an ti ṭheu tawn. Mah bantuk kha ṭih a nung ngai. Zeiruangah Jesuh nih hiti hin thla nan cam lai tiah a kan chimh. Sullam tampi a ngei. Nan duhning poh in nan siarem ningin cam ko uh a kan ti lo mi hi fakpi in ruah ding a si. Jesuh cawnpiak mi thlacamnak "Vancung um kan pa (Mathew 6:5-13 chung rel) hi tlangkhat hnu tlangkhat a sullam ruat hmanh, na cam hnga ding vialte kha a huap dih ko lai. Nifatin nangmah duhning te in, zalong tein thla a cam zungzal mi na si ahcun, thlakhat cu chimhhlah zarhkhat na cam ahcun chim ding a um ti lai lo i na chim cia chimṭhan lengmang a si ko lai. Mah kha Pathian duh ning cam ahcun, tinak a si. Pathian cu kan herhmi a hngaltu le thlite kan tuahmi a hmutu a si i amah nih hiti hin cam uh a kan ti ningin kan cam ahcun a za ko lo maw. Thiamhlei khoih a hau maw? 

6. Kan thlacamnak hi Thiang Thlarau cungah hrambunh ding a si. Baihaat in kan cam tikah vanzuang biachim bantuk in cam ding a si lo. Thiang Thlarau kha mitthlam ah cuanter, biafang hna kha thukpi in ruahpah, tangdornak lungthin a tangbik ah chiah in cam ding a si. Bible ca kan rel bantuk in i biatak ding a si.

7. Kan ral hna nih cun zeitikhmanh ah zaangfahnak an kan ngei lai lo i kanmah tu nih hriamnam ṭhabik in kan doh a hau lai. Hi kan nunchung vanram lei kan khualtlawnnak ah hin hriam ṭhabik kan ngeihmi thlacamnak hi ahmanthiam u si law Pathian kamhmi vanram nuamah amah he zungzal in zungzal tiang um ṭi ding ah biatak tein i tim cang hna u si.