Baitak Rumnak

“Sihmanhsehlaw Pathian nih a thawh i, ‘Mihrutpa, tuzan hrimhrim ah hin na nunnak cu an in lakpiak a hau lai; cucaah nangmah ca i na khonmi thilri vialte hi aho nih dah a co kun lai?’ a ti,” tiah a ti. Cun Jesuh nih cun a biadonghnak ah, “Hitihin pei anmah ca lawng i chawva a khong cuahmah i Pathian hmuhnak i a rum ṭung lomi cu an si cu,” tiah a ti. (Luke 12:20-21)

Hi Bible cacang hi Bawipa Pathian nih vawlei thilri cung lawngah a zeizong vialte chiah aa tim mi pa sin i a chim mi bia a si. Mirum pa nih a ngeih mi thilri hna cungah a lung diriam nak um lo in a ngeih cia mi thilri nak in tam deuh hmuh awk, khawl awk, khawmh awk ah aa timh mi a si. Sihmanhsehlaw, hi vawlei a nun caan zeizat a sau rih lai ti aa hngal hrimhrim lo.

A si khawh ah cun vawlei thilri le vancung ram co khawh nak ding thilri pahnih ngeih khawh, kawl khawha si ah cun a ttha ngai ko hnga. Sihmanhsehlaw, pakhat lawng kawl ding, pakhat lawng Bawi ah chiah i a rianttuan ding kong a kan chimh duhnak a si. “Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat deuh lai; pakhat sinah khan cun zumhawktlak tein nan um lai i pakhat tu kha cu zei ah nan rel lai lo. Pathian le tangka cu an rian nan ṭuan kep kho lai lo” (Matt 6:24).

Vawlei chawva kan kawl mi hna hi sual nak cu a si hrim lo. Kan pawcawm nak ding caah cun kan kawl ding hrimhrim cu a herh mi a si. Kan pawngkam i a um mi kan chungkhar, kan nupi, kan fa le hna Pathian duh ningin ttha tein an tthan khawh nak hnga ding caah le zei hakauh le fir a um lo nak hnga ding caah cun a herh ve hrim hrim ko. Sihmahsehlaw, vawlei thilri lawng kan kawl i vancung thilri konglam kan philh sual a si ah cun ngaihchia kan si ko lai i kan nun man a ngei hrim hrim lai lo. Zeicah tiah cun, vawlei thilri cu hakauhnak, nek ngeih nak, midang mitthli tlak ternak tbk…, lawng te a si caah sual nak lam fawi tein phanh dingah lam a hruaitu a si caah a si.

“Cucaah zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek ṭhiamṭhiam ko hna lai. ³⁴Cucaah thaizing nih lungretheihnak cu a za in aa ngeih ve ko lai. Ni khat nih a chuahpimi harnak cung i a dang chonh chih lengmang hi a herh lo.” (Matt 6:33-34 )

Vancung pennak a kawl kho zungzal tu kan si khawh nak hnga ding caah kan herh mi vel thluachuah Pa Pathian sinah hal zungzal hna u sih.