Jesuh Dawtnak

Luke 13:31-35 chungah kan hmuh mi cu; Farasi mi tlawmpal kha Jesuh sinah an ra i, “Herod nih thah an duh caah hika hin na chuah a hau,” tiah an chimh. Hi Farasi mi hna hi a thli tein Jesuh hnu zultu an si hna hnga maw timi zong ruah ding a um. Zeicah kan ti a si ahcun a thli tein timh mi thil an theih caah le a thli tein an theihmi kha Jesuh sinah chim in luaṭer an duh caah a si. Kap khat lei in vun ruat ṭhan hna u sihlaw, hi Farasi mi hna hi Jesuh cungah nahchuahnak a ngeimi hna zong a si kho mi an si. Jesuh nih cun a leh hna i, “Va kal u law, cu cenghngai cu, ‘Nihin le thaizing ah khuachia kha ka ṭhawl hna lai i damnak kha ka tuah lai, cun a nithum ni ah ka rian cu ka lim lai,’ a ti, tiah va chim u,” tiah a ti hna. Cun a peh ṭhan mi cu, “Zeicahtiah profet cu Jerusalem khuachung dah ti lo ahcun khuazei hmah ah thah phung a si ṭung lo.”

“Maw Jerusalem, Jerusalem, profet kha na thah hna i pathian nih na sinah lamkaltu a rak thlahmi kha lung in na rak cheh hna. Arpi nih a fale cu a thla tangah a huh hna bantukin voi zeizat te dik na chung mi cu ka kut in huh ka timh hna i na duh lo. Zohhmanh, na biakinn cu Pathian nih a hlawt cang. Cun hihi kan chimh, nangmah nih, ‘Bawipa min in a rami cu a cungah thluachuahnak um ko seh,’ na ti caan a phak hlan cu na ka hmu ti lai lo,” tiah a ti.

Hi Farasi mi hna hi Jesuh lei kap ah a ṭang mi an si hrimhrim lo timi cu a fiang ko. An thil ti khawhnak hna le an ṭuanmi an reng, an hmunhma Jesuh nih a kan chuh dih sual lai tiah an thin a phan caah a si. A si khawh ahcun Herod nih Jesuh timi pa hi that seh tiah khua a khaang lengmang mi zong an si. Sihmanhsehlaw Pathian nih a tinh cia mi cu minung nih hrawh khawh lo a si nak kha nihin kan theih mi thawngṭhabia chungin fiang tein kan hmuh khawh. 

Kan nih vialte hna zong Jesuh nih khamh a kan duh i a thladem tang, a lungthin chungah chiah a kan duh timi hi nihin Bible cathiang chungin hmuh khawh a si ko. Farasi mi hna cu Jesuh a cohlang duh lomi an si. Jesuh kut tang zongah a um duh lomi an si. Kannih hna hi teh Pathian duh ning zulh lo, Pathian kut tang um duh loin mah duh ning in a vakvai mi kan si sual hna maw? Jesuh nih cun kanmah hna he aa naih tein um zungzal a duh ko. Kan sin ah rat in a kan kawh tikah kan cohlang kho cio hna lai maw, kan hlawt lai dah? Farasi mi hna nih cun Jesuh kha hloh an rak duh. Kannih hna nih teh Jesuh hi zeitin dah siter kan duh ve?