Tho tuah

Mi tampi nih Jesuh kha a buut in an buut ko nain bawmhnak a herh taktak mi kha Jesuh nih cun a hmuh khawh zungzal ko. Thangṭhat nak le conglawmhnak hna nih Jesuh mit kha bawmhnak a herh taktak mi hna sin in a phenh kho lo. Khrihfa ka si tiah aa ti mi kannih hna nih hin kan sin in bawmhnak a herh taktak mi hna kha i hmuhter loin um sual hna hlah u sih. I theihter loin i um ter sual hna hlah u sih. Kan sin in bawmhnak a herh taktak mi hna kha chawva le minthannak hna ruangah hmuh khawh lo tiangin i umter hna hlah u sih. Kan pawngkam ah pakhat khat paoh nih cun kan sin in bawmhnak a herh mi an um zungzal ko timi kha theih ding a si.

Nain khua i nuhmei nu hi (Lk 7:12) a fapa ngeihchun te nih a thihtak tikah ngeihchiatnak fak piin a ingtuar mi nu a si. Hi minu caah cun a fapa a thih ruangah hmai lei a nun chan zong a um ti lo ti tiang in ti khawh a si. Zeicah ti ah cun pakhat te lawng a ngeihmi a fapa nih a thih tak cang caah a si. Hi mi nu intuarnak hi Jesuh nih cun fiang tein a hmuh caah minu nih a nunnak ah a herh bik mi a fapa te kha nunnak a pek ṭhan hi a si. Jesuh nih cun kan herh taktak mi cu fiang tein a theih ko. Jesuh nih kan herh taktak mi kha hmuhpiak loin a kan um piak lo bangin pek lo zongin a um fawn lai lo. Kan herh taktak mi a si ah cun a kan pek taktak ko.

Nihin thawngṭhabia ah (Lk 7:11-17) Jesuh cu kan i ruahchannak a si nak kha fiang tein kan hmuh khawh. Jesuh nih tlangvalpa kha thihnak in a thawhter ṭhan bangin kan nih pakhat cio hna zong nun thar in ka nun ding hi a kan duh piak mi a si. Tlamtlin lonak pakhat khat ruangah ‘ka nunnak zeihmanh santlai ti lo’ tiin um loin Jesuh sinah kan panh lengmang ding kha Bawipa nih a kan duh piak mi a si. 

Lungretheih nak le ngaihchiat nak chung lawngah i ciah loin Bawipa Pathian sinah lawm tein kan panh ṭhan zungzal ding kha Jesuh nih a duhmi a si. Nihin ni ah Bawipa nih mino pa siseh, kannih pakhat cio hna zong kha “Tlangvalpa, tho tuah, kan ti,” tiah a kan ti cio ko. Bawipa nih kan nunnak ah nuam tein nun ding le nun tling tein kan nun ding hi a kan duh piak zungzal ko.