Khrihfa le Theipar Ṭha

Khrihfa sining dirhmun in hi vawlei cung kan nunnak ah hin mission rian kan ngei cio hna. Cu kan mission cu ṭhatnak theipar a tlai mi le Jesuh zultu ṭha siding kha a si. Zeitindah Jesuh zultu ṭha, theipar ṭha tampi a tlai tu kan si khawh lai? Kan zumhmi kan Pathian thawngṭhabia kha kan si khawh ning cio in phuan ding le nunzia ṭha-dawh in nung ding kha a si ko. Zeihmanh kan tuah lo, a si ah cun a zei ti hmanh in theipar ṭha a tlai kho mi Khrihfa ṭha kan si kho lai lo. 

Theipar ṭha kan tlai khawh nak hnga ding caah nihin Missa thawinak chung i kan relmi thawngṭhabia (Lk 19:11-28) chungin Jesuh nih fiang tein a kan cawnpiak. Tipilnak in hnu siseh, Thiang Thlarau thazang pek kan si hnu ah siseh “theipar ṭha tlai cio dingin” (thawngṭhabia phuan dingin) mission rian khinh cio mi kan si. 

Sihmanhsehlaw mi tampi nih kan zumhnak kha miphun dang-zumhnak dang (other religion) hna sinah langhter ding le chimphuan ding hi kan ṭih tawn; asiloah kan ning a zak tawn. “Ka thei lo” “Ka chim thiam lo” “Ka hngal lo” tiin kan zumhnak kong he pehtlai in sonhtarhnak (excuse) pek kan hmang tawn. 

“Kan zumhnak kha zeidah a si” timi theih kan i zuam lo a si ah cun zeitindah kan theih khawh lai i midang kha kan chimh khawh hna lai? Bible kan rello a si ah cun zeitindah Bible konglam kan theih khawh lai? Theih kan duh a si ah cun kan hlathlai a hau. Thil tam deuh kan hlathlai a si ah cun tam deuh kan theih ko lai. Jesuh he pehtlaihnak tam deuh kan ngeih a si ah cun Jesuh kong tam deuh kan theih ko lai. Bawipa he tam deuh kan i pehtlaih a si ah cun kan nunnak ah ṭhatnak theipar tam deuh kan tlai ko lai. 

Khrihfa pakhat kan si hnu ah zeihmanh kan tuah lo a si ah cun hmanungbik ni biaceihnak ah sual phawt kan si sual lai. Zeihmanh a tuah lomi sal pa kha a Siangpahrang pa nih “Zeicahdah tangka cu tangka khonnak (Bank) ah na rak chiah lo? Rak chia law cu, ka kir tikah hin a miak he ka hmu hnga lo maw?” (Lk 19:23) tiah a ti. Zeibantuk theipar ṭha hmanh kan tlai lo a si ah cun caan dongh ni ah ngaihchia kan si sual lai. 

Khrihfa kan sinak ah theipar ṭha tlai ding le tlai lo ding cu kan mah nawl a si ko; kan kut cungah a um mi zong a si ko. Zei khi dah kan i thim lai? 

Theipar ṭha kan tlai lo a si ah cun “Hau ko. Zeicahdah vawlei dah tu kha a ei lengmang lai?” ti kan si sual lai. (Luke 13:7)

Cun Jesuh nih: “Thei ṭha a tlai lomi cu hau i mei chung i paih an si tawn,” tiah a ti.  (Matt 7:19)