Pathian Biakinn cu Thianter ding a si

Jesuh cu Biakinn chungah khan a vung lut i chawdawr pawl kha a ṭhawl hna i, “Cathiang chungah, ‘Pathian nih ka inn cu thlacamnak inn a si lai,’ a ti, tiah aa ṭial. Sihmanhsehlaw nannih nih cun mifir tuhnak kua ah nan ser cang,” a ti hna. (Lk 19:45-46)
Nihin Missa raithawinak chungah kan relmi thawngṭhabia (Lk 19:45-48) hi a tawi ngai ko. Sihmanhsehlaw ruah ding tampi a um kha kan hmuh khawh. “Jesuh cu Biakinn chungah khan a vung lut i chawdawr pawl kha a ṭhawl hna” tiin nihin Bible thiang kan relmi a hramthawhnak ah kan hmuh.  Nihin Bible nih Jesuh sining kha a thin a hung ngai mi sining in a langhter. Zeicahtiah cun ‘Jesuh cu Biakinn chungah khan a vung lut i chawdawr pawl kha a ṭhawl hna’ tiah a ti. Aa nuam ngai mi hna le aa lawm ngai mi hna nih midang kha hrang ngai in an ṭhawl bal hna lo.  

Bible thiang chungah Jesuh cu “Dawt a thiammi, zawnruah a thiammi, a lungsau mi, mi nunnem mi, ngaihthiamnak a ngeitu, … tbk,” tiin a langhter mi a si. Sihmanhsehlaw nihin kan relmi Bible thiang chungah cun Jesuh cu a thin a hung taktak ko. Zeicahtiah a thianghlimmi hmunhma, Pathian Biakinn kha pakhat le pakhat i hlennak le mah zawn lawng ruah in tangka chawva kawlnak hmun ah an hman caah a si. A thianghlimmi hmun kha an thur-hnawmhter caah Jesuh nih a ṭhawl hna nak kha a si. 

Nihin kan chan ah hin teh a thianghlimmi hmunhma a simi kan Biakinn kha pawcawmnak kawlnak hmun ah kan hmang sual maw? Phaisa kawlnak hmun ah kan hmang sual maw? Biakinn cu Bawipa Pathian he kan i pehtlaihnak hmunhma a si caah upatnak lungthin he dai tein Bawipa he i tonnak, i chawnhnak hmun ah hman ding a si. 

Lenglei hmuh khawhmi Biakinn a hnawmhter tu an um bangin chunglei lungthin Biakinn a hnomhtertu zong an um. Jesuh nih lenglei siseh, chunglei siseh hnowmhter a duh hrimhrim lo. Thianghlim tein a um zungzal ding kha a duh.

Biaknak min hmangin pakhat le pakhat karlak ah rem lonak a chuahtertu an um bangin Biaknak phung, Pathian min hmangin tangka a kawlmi hna zong tampi an um. Biakinn chungah Pathian sinah raithawi pekchanhnak tuahnak caah tiin chaw a dawrmi, sipuazi a kawl mi hna bantuk zong tampi an um len ko (Matt 21:12). Jesuh nih mah bantuk lungthin le sining kha a duh lo; cun thianter a tinhmi zong a si. 

Nang le kei zong biaknak min hmang in chawva a kawl mi kan si sual maw? Kan si sual a si ah cun Biakinn chungin Pathian nih a kan ṭhawl, a kan dawi ve sual lai. Kan lungthin Biakinn chung zong ah a thianghlim lomi thil chawva lawng a kawl mi kan si sual maw? Jesuh nih a duh lomi a si khah!