Bawipa Thangṭhatmi Lungthin

Pakhat le pakhat thil i pek timi cu i dawt ruangah le i zumh ruangah a si; cun hruaitu hna cawnpiakmi (Pathian Bia) nawl ngeih ruang zongah a si fawn. Pathian sinah pekchanhnak kan tuahmi cu Vancung ramnuam cohlaan kan duh ruangah ruahchannak nganpi ngeih in kan tuahmi a si. 

Cun Jesuh nih aa thawh i, “Hihi kan chimh hna: Hi a si a fakmi nuhmeinu nih hin a taktak ti ahcun hawi dang vialte nakin tam deuh a sanh. Zeicahtiah a dang tham nih cun an chawva a hleivuang kha pei an pek ko cu, sihmanhsehlaw hi nu nih hin cun, a si a fak na tein, a nunnak ding ca i aa chiahmi kha pei a dihlak in a pek cu,” tiah a ti. (Lk 21:3-4)

Mah zawn ruahlo in midang va bawmh le dawt ruangah zeitluk in dah lawmh a si ti hi kan hngalh cio mi a si. A dik mi dawtnak cu zeitik hmanh ah mah zawn aa ruat bal lo, siannak lungthin a ngei. Hi kong he pehtlai in nihin kan theih mi thawngṭha bia (Luke 21:1-4) ah kan Bawipa Jesuh Khrih nih biakinn pawngah dir in cheu hra cheu khat a petu hna a zoh hna i a hnu zul tu hna sin ah fiang tein a cawnpiak hna.

Bawipa nih mirum pawl pekchanh mi kha thangṭhat lo in nuhmei nu pek mi phaisa sen pahnihte a thlak mi kha a thangṭhat. Bawipa nih a kan cawnpiak duh mi cu, “Dawtnak cu sui le ngun nak in a man a sung deuhmi a si. Pathian sinah pekchanhnak kan tuah tikah dawtnak, zumhnak le ruahchannak lungthin tak tein pekchanh ding a si,” timi kha a si.

Cheu hra cheu khat pekchanhnak kan timi ah hin kan lungthin tak tein pekchanh dingin Bawipa nih a kan duh piak. Siannak um tuk loin pek mi chawva cu zeitlukhmanh in tam ko hmanh sehlaw a man a um lo. Siannak lungthin he pek mi chawva cu zeitlukhmanh in tlawm ko hmanh sehlaw  man a ngei zungzal isunlawih zungzal a si ko.

Pekchanh kan tuah tikah Pathian nih a zoh mi cu kan pekchanh mi thil a tlawm le a tam si lo in a pe tu kanlungthin kha a bik in a zoh tinak a si. Nuhmei nu nih hin a ngeihchun phaisa tlawm te hi a mah caah aa chiah khawh mi a si ko. Sihmahsehlaw, mah zawn ruah lo in a ngeihmi phaisa a dih lak in Pathian sin a pek tikah Pathian nih a thangṭhat. Nuhmei nu tuahser nak Pathian nih a thangṭhat bangin, kan nih hna zong kan tuahser mi thil hna cungah Pathian nih thangṭhat mi kan si cio a si ah cun zeitluk in dah thluachuak mi kan si cio hna hnga ti kha ṭha tein ruat cio hna u sih.

Kan Bawinu Mary zong Pathian nih a vancung mi hmangin a thangṭhat ve: “Pathian nih nangmah cu vel an ngeih”(Lk 1:30); Elizabeth zong nih Pathian Thiang Thlarau in a chim mi cu: “Nangmah cu nu vialte lakah thluachuak bik nu na si”(Lk 1:42) tiin a ti ve. Zeicah kan ti a si ah cun Bawinu Mary zong nih a zeizong vialte kha Pathian sin ah a pekchanh caah a si.