Adventu Phazawngdan Hna Sullam Fianternak

ADVENTU (Hngah caan)

Adventus (hngah caan) timi cu Pathian cu kan thinlung chungah aa tlaktein a run luh khawhnak hnga caah thlarau lei he pehtlaih in a hleikhun timhtuahnak caan asi.

ADVENTU PANGPAR KUAL SULLAM

Adventus hngah caan chungah a pummi muisam Pangpar kual an tuah i phazawngdan pali, cheukhat nih panga an van. Pangpar kual i pangpar caah thingṭeng le thinghnah hring an hman. A kual a pummi sullam cu, Pathian cu hramthawk ngeilo donghnak zong a ngeilo, tinak a langhter. Thinghnah hring cu hringdildel in a nungmi tinak asi. Phazawngdan pali sullam cu kum 4000 aiawhtu an si.

Chim duhmi cu Adam, Eve thawkin Jesuh Khrih a chuah tiangah kum (4000) a rau. Phazawngdan pakhat cio nih kum (1000) cio kha a aiawh. Adventu zarhkhatnak thawkin pakhat pakhat cio in van asi.

Pakhatnak Phazawngdan sullam

Prophecy candle (Profet phazawngdan) tiah an ti. A sullam cu Hope timi ruahchannak kha a aiawh. Profet pawl nih Bawipa a rat lainak kha a changchang in an chim cio hnu ah an i ruahchan ningin thawngṭhabia hna kha kutchanh in an rak chimhchin. Profet phazawngdan he pehtlaih in (Isaiah 7:14) ah “Bawipa nih hmelchunhnak a pek laimi cu Ngaknu pakhat a um i fapa a hrin lai” timi thawngṭha kha a rak pek.

Pahnihnak Phazawngdan sullam

Pahnihnak phazawngdan cu Bethlehem phazawngdan tiah an auh. Cu nih “Dawtnak” kha a aiawh. Zulhtawn mi phunglam ningin Jesuh Khrih i Bethlehem caw rawl einak kuang a aiawh mi asi. Luka 2:12 ah, “Nan ca i hmelchunhnak cu; ngakchiate pakhat kha puan an zual i caw rawl einak kuang chung i an thlim kha nan va hmuh lai” tiah a timi kan hmuh.

Pathumnak Phazawngdan

Pathumnak phazawngdan cu Shepherd Candle (Tuu khal phazawngdan) tiah an ti. Joy timi lunglawmhnak a aiawh mi asi. A sullam cu Bawipa Jesuh hnu hmasabik thawngpangṭha a theitu Tuukhal hna kha Vanbawi Gabriel nih (Lk 2:8-11) ah Bawipa Jesuh chuahnak kong langhternak philhlonak canah Tuukhal Phazawngdan tiah an auhnak asi.

Palinak Phazawngdan sullam

Ahnubik phazawngdan cu Angel Candle (Vancungmi Phazawngdan) tiah auh asi. Hi phazawngdan nih ‘Daihnak’ kha a aiawh. Hi phazawngdan he pehtlaih in Bawipa Jesuh a chuah hnu ah Van mithiang hna an ra i conglawmhnak hla an rak sakpiak. “A sangbik Van ahkhin Pathian cu sunparnak hmu ko seh, cun a dawtmi hna umnak Vawlei ahhin remnak (daihnak) um ko seh” (Lk. 2:13-14) tiah a chimnak kha asi.

Adventu caan chung ahhin mah le mah pumpak pakhat cio kan i remhchunh lai. A rauh hlan i a ra dingmi Bawhte Jesuh kan thinlung ah a hrin khawhnak hnga aa tlak dingin timhlamh hna usih.