Pathian Thlarau Duhning in Nung u sih. . .

Ulh caan zarh (5) nak kan rel hnga ding mi Bible Cathiang hna kha raut tti hna u sih law Bawipa sin in thazang  i laak tti hna u sih.

A voi(1) nak kan rel mi cu Ezekiel 37:12-14 tiang a si.

Cu chung i kan hmuh mi cu: “ka thlarau cu nan chungah ka chiah lai”(Ezakeil 37:14) tiin kan hmuh.

Kan Bawipa Pathian nih minung pakhat cio kan chungah a thlarau kha a rak kan chiah piak tak tak ko. Pathian Thlarau cu a thianghlim mi le thatnak vialte a chuahter tu a si. Pathian nih a  kan chiah piak mi thlarau duh ning in kan nun a si ah cun Khamh kan si ko lai. Pathian thlarau duhning zulh cu nunnak a si.

A voi (2) nak Cathiang cu Rom 8: 8-11 tiang a si i:

Cu chungah kan hmuh tthan mi cu: “An minung sining duhnak lawng a zul mi nih cun Pathian kha an lawmhter kho lo”(Rom 8:8) tiah a ti ve.

A voi 1 nak kan rel mi ah Pathian thlarau kan chungah chiah piak kan si nak kong a si. a voi 2 nak kan rel mi ah Pathian thlarau si lo in minung duhnak thlarau kong kha a si. (Minung duhnak lawng a zul mi nih cun Pathian kha an lawmhter kho lo) tiah a ti tik ah minung duhnak cu a thianghlim lomi le rawhralnak lei ah a kan panhter tu lawng te an si caah a si.

Pathian nih a kan duh piak mi cu a kan pek mi Amah Thlarau duh ning zulh in nun kha a si. Kan mah duh ning lawng kan zulh i kan nun a si ah cun Pathian duhning he aa ral chan mi a si caah thihnak lei a kan phanhter tu lawng a si. Zeicah kan ti  a si ah cun Pathian hrim hrim cu nunnak a si bantukin a thlarau duhning in nun cu nunnak lam ah a kan phanhter tu a si caah a si.

Thawngtha kan rel hnga ding mi hi Johan 11: 1-45 tiang a si.

Thawngttha chung kan hun zoh tthan tikah Lazarus thihnak in Bawipa nih a thawhter tthan nak kong a si.

Hi kaa zawn ah ruat ti hna u sih. Lazarus maw a thi mi a si. Mary le Martha le an chung pawl maw a thi mi an si.

Bawipa nih “keimah cu nunnak ka si” tiah a ti mi kha Mary, Martha le a chungkhar hnal nih biatak tein an theih tak lo, an i fian tak rih lo ti cu kan hmuh khawh. Nunnak Bawipa an pawngah a dir ko nain an hmu kho lo. An thei kho tak lo.

Hi ka zawn ah thlarau lei in kan zoh tikah a thi tak tak mi hna cu Mary, Martha le an chungkhar pawl hna tu hi an si.

Dawtmi u le nau hna, Bawipa duhnak kan tuah ah cun Nunnak lam ah kan phan ko hna lai. Minung duhnak lawng kan zulh, minung ruahnak lawng kan i bochan ah cun Pathian duhning he aa ralchan mi a si caah Thihnak lam tu ah a kan phanhter ko lai.

Bawipa nih a duh mi cu Amah kha biatak tein zumh le i Bochan kha a si. Mary le Martha nih Bawipa kha an zumh an i Bochan tak tak tikah a nung mi an tta pa an cohlan tthan.

Bawipa kha kan thinlung dihlak in i bochan hna u sih law kan chung i a kan chiah piak mi Bawipa Thlarau duhning hna kha zumhfek tein tuah khawh i zuam zungzal hna u sih. Bawipa nih Thluachuah in pe ko hna seh.