Fek tein thlacam

Cun Jesuh nih an mit kha a tongh hna i, “Nan zumhning te cun si ko seh,” tiah a ti i annih cu khua an hmu kho ṭhan. (Matt 9:29)

Khua hmuh khawhnak kan ngeihmi hi Pathian thluachuah a si. Kan nun mi zong hi Pathian thawngin a si, a thluachuah a si i Amah nih nunter a kan duh rih caah a si. Nihin Missa thawinak chungah kan relmi cathiang cu Matthew 9:27-31 chungin a si. Hi cathiang chungah mitcaw pahnih hna nih Jesuh hnu zulh in ‘Kan damter ko’ tiah an halnak kong a si. 

Jesuh nih thihnak in ngakchianu te a thawhter ṭhan hnu ah hi mitcaw pahnih hna zong hi damnak a pek ṭhan hna timi zong kha Matthew 9: 18 in kan rel ah cun kan hmuh mi a si. Hi mitaw caw hna nih hin Jesuh nih khuaruahhar thil a tuah khawhnak kong hna kha an rak theih cia hrimhrim cang lai timi zong cu a fiang ngaimi a si ko. Jesuh nih mithi nu te a thawhternak kong zong lam i a kal cuahmi mi hna sinin an rak theih khawh cang mi zong a si. Mitcaw hna nih cun Jesuh an pawng a kal an theih in “David Fapa kan zaangfah tuah” tiin heh tiah an au len ko. Jesuh nih, “Hihi ka tuah khawh tiah nan zum maw?” tiah a hal hna tikah annih nih, “Asi, na tuah khawh tiah kan zumh bawipa,” tiah an leh. Cutikah Jesuh nih, “Nan zumhning te cun si ko seh,” tiah a ti hna i mitcaw hna nih cun damnak tling an hmuh ṭhan. 

Kannih hna zong “Jesuh sin in zeibantuk damnak dah ka duh?” tiin hi mah le mah biahalnak tuah hmanh hna u sih. Mitcaw hna bangin Jesuh sinah ningzak loin le lungdong loin kan duhmi kan hal bal kho cio hna maw? Cun Jesuh nih a kan pek hrimhrim lai timi zumhnak tling teh kan ngei kho cang maw? Thla kan cam ningin caan saupi leh lo kan si caan  ‘Pathian nih ka thlacam a ka let lo’ tiin lung dongin na um bal maw?  Pathian sin thlacam ti loin teh na um bal maw? Asiloah fak deuh in dah Pathian sinah thla na cam?

Kan thlacamnak hna hi Pathian nih a theih ko hna. Sihmanhsehlaw kan hal mi a kan pek ning hi phundang in a si kho mi a si. Kan herh taktak mi kha phundang in a kan pek khawh mi a si. Cun Pathian nih kan thlacam a kan leh ning zong hi kan ruah ning in siloin pawngkam um pakhat khat zong hmangin a kan leh khawh mi a si. 

Lungdong lo tein le zumhfek tein Pathian sinah thlacam zungzal ko hna u sih. Pathian nih a kan pek hrimhrim ko lai.  Mah le mah caah siseh, hawikom hna caah siseh, kan rampi chungah daihnak le dawtnak a umṭhannak hnga ding caah siseh, lungdong lo tein Pathian sinah thlacam cio ko hna u sih.