Jesuh cu kan himnak a si

“Tuu 100 a ngeimipa nih, a tuu pakhat cu a tlau ahcun, zeidah a tuah hnga, tiah nan ruah? Tlang cungah a tlongmi 99 cu a kaltak hna lai i a tlaumi cu a kawl lai. A hmuh tikah 99 a tlau bal lomi cung nakkhan hi tuu pakhat cungah hin aa lawm deuh. Cu bantukte cun, vancung khua i a ummi nan Pa nih, hi ngakchia tete pakhatte hmanh hi tlauter a duh hna lo.” (Matt 18:12-14)

Nihin Missa raithawinak chungah kan relmi thawngṭhabia hi a tawi ngai ko na in ruah ding tete tampi an um kha hmuh khawh a si. Nihin thawngṭhabia chungin Bawipa nih cawnpiak a kan duh mi tete kha tawi tein ruat ṭi hna u sih. Nihin thwangṭhabia cu tuukhal-tuu ngeitu le tuu tlau kong a si.

Hi tuukhal pa nih hin zei ruangah dah tuu 99 kha chiah tak in a tlau mi tuu 1 te kha caan pek in a kawl hnga? Ruat ve hmanh. 

Khrihfa kan si bangin thawngṭhabia phuangtu hna sin in Bawipa cawnpiakmi tahchunhnak bianabia sullam hna kha tampi kan theih bal cio ko cang ko hna. Kan Bible cathiang chungah abikin ‘Gospel-thawngṭhabia chungah “Jesuh cu tuukhal bantuk, cun kannih cu tuu bantukin tahchunhmi kan si.” 

Ahopaoh hi caan khatkhat ah cun kan tlau, kan pial sual cio tawn ko hna lai dah tiah ka zumh. Kan tlau hna ning, lam pingpalo kan zulh sual hna ning zong hi aa lo cio men lai lo, a dang cio ko lai. Na tlau lio caan te ah khan zeibantuk thil hna khi dah na ton hna i zeibantuk theih hngalhnak khi dah na ngeih? Bawipa Pathian duh ning zuh duh loin mah duh ning lawng zulh lio caan, lam pial sual lio caan ah khan zeibantuk thil hna khi dah na ton hna? Cun na tlau lio caan ah khan zeitindah nangmah le nangmah naa khalh ning a si? Na tlau, na pial sual lio caan ah khan Jesuh he aa naih tein ka um kho tiah naa ruat kho maw, ‘Bawipa nih a kan kawl peng’ timi teh na thei kho maw, na cohlang kho maw? Zeitindah Bawipa sin na rak panh ṭhan khawh ning a si? Cun na tlau lio caan ah na ton mi hna chungin zeibantuk theih- hngalh nak hna khi dah na ngeih khawh hna?

A kan hlam zungzal tu Bawipa sin kan panh khawh ṭhan tikah Bawipa nih a kan si lo i a kan hrem fawn lo. Lunglawm tein a liang cungah a kan khinh a kan cawisan ṭhan i ṭhan i a himnak hmun ah a kan kirpi ṭhan lengmang ko. Bawipa kawhnak aw nemte kha theih in a let kho tu, tlaunak chungin a kir ṭhan kho tu kan si khawh cio nak hnga Bawipa sinin thluachuah hal zungzal ding a si. 

Bawipa kawhnak aw thawng kha leh ding le leh lo ding cu pakhat cio ‘kanmah nawl’ a si ko. Na leh a si ah cun na him lai, na leh duh lo, naa hmuhter duh lo a si ah cun na tlau thai ko lai.