SUAL NGEI LO NGAKNU THIANG BAWINU MARY A PAWI A SI NAK PUAI NI (IMMACULATE CONCEPTION OF THE B.V.MARY)

Vawleicung khua zaram kipah Bupi dihlak nih sualnak ngeilo in Ngaknu thiang Bawinu Mary kha pawi a si nak puai sunglawi (The Immaculate conception of the Blessed Virgin Mary) cu kum fatin te tuah zungzal a si. Tukum 2020 ahcun December ni (8) ah tuah a si, Bawinu Mary kong he pehtlaih in khamhnak tuanbia le kan khamhnak kong thawngṭha bia cu, Chim le phuan a si tawn, a bikin kan chan ahhin. Sualnak ngei lo Mary kong cu theih le hngalh a herh khun tiin ka hmuh caah, Vun langhter than i thazaang lak ti than ding kha ka saduh thahnak a si.

Kan Pathian khamhnak kong cu a hlan tein Pathian nih thil tampi hmang in a rak langhter lawng si lo in, Ami hna, a profet hna le Vancung mi hna kha a rak hman hna. Pathian khamhnak tuanbia le khamhnak rian tuannak kong cu, minung leikap in cun theih le hngalh khawh a si bal lo. Sihmanhsehlaw Pathian nih kan sinah a phuan mi a bia, a kan khamhnak thawngtha cu tlawmte lawng kan theih i kan hngalh mi hi a si. Pathian biathli le biathuk hna cu a caan a phak tikah chimh le phuan a si caah, a hun tlin tak tik lawngah lunglawmhnak le hnangamnak tling cu a kan pek.

Pathian khua khannak le tinhning tein thil zeizong vialte cu an si dih ko hna. Mary nih sualhram ngeilo in nau a pawi mi le sualnak ngeilo in Fapa Jesuh a hrinnak nih Pathian tuah mi thil khuaruahharnak tampi kha a kan hmuh sak. Ruat hmanh u, kan Bible a hramthaw in Biathlam donghnak tiangah biafang chung aa thup mi biatak thawng tha cu kan Bawipa Jesuh Khrih kong lawngte an si dih. Cu ahcun a Nu Mary kong zong cu then awk thalo telh in tialchih a rak si.

St. Johan nih cun a chim, A hramthawk ah Bia cu a rak um cang. Cu Bia cu Pathian a si, Cun Bia cu minungah a cang tiah (Jn; 1:1,14) ah a rak ti. Amah cu Fapa Pathian Jesuh kha a si. Jesuh cu a hramthawk tein a rak um cang bantukin a Nu Mary zong cu a rak um ve cang ko, “Nang mah le minu cu nan i hua lai, a tefa le na tefa cu ral an si lai. Minu nih na lu kha an rial chih lai i nang nih a kedil kha cuk naa zuam lai” (Gen 3:15) tiah Pathiah nih rul kha a rak ti tikah, a langhter duh mi biatak cu, hihi a si. Rul cu satan kha a si i Minu cu Eve kha si ti loin Mary tu kha a si. Zeicahtiah Minu Eve cu rul nih khan a hlen i a tei cang.

Minu Mary le a tefa hna cu aho te pawl dah an si. “Limkeng cu Minu cungah khan a thin a hung ngaingai i, Minu tefa a tang rih mi vialte doh awkah aa thawh, cu hna cu Pathian nawlbia a ngai i Jesuh nih a phuan mi biatak zumh awk tlak tein aa tlaih mi kha an si. (Bia 12:17) Limkeng, khuachia, rulpitar kan ti mi satan le a riantuannak vialte hrawh awk le tei awk ah Pathian nih a thim mi Minu Mary chungin a Fapa ngeihchunhte cu vawlei ah Mary chungin a chuahter. Cucaah Fapa Jesuh Khrih nih satan le a riantuannak vialte cu a tei dih. Pathian nih a thiang mi a Fapa hrin awk ah Mary cu sual hram ngei lo le sualnak ngeilo in a ser. Cu ruangah Mary nih cun Pathian thawnnak thawngin satan tei khawhnak le a lu lamhchih rialchih khawhnak thawnnak cu a ngei. Cucu Pathian thil tuah mi a si. Cucu kannih nih kan zumh i kan i lawm. Asinain micheu hna nih an zum lo i an pom khawh lo mi thil zong a si ve. Voikhat cu ka unu a vapa nih nan nihnih Adam sualnak in hrin mi sualfa a si ko mi Mary cu upatnak nan pek i a sinah bawmh hal in thla nan cam. Cucu sullam a ngei lo tiah a ka ti. Aw a si ko. Asinain Pathian nih thil zeizong vialte hi a tuah khawh dih ko ti cu na zum kho ve hnga maw tiah ka hal ve. Zum henta tiah fawi tein a ka leh, a si le Pathian nih hin a thiang mi a Fapa hrin awk ah a Nu Mary cu sualhram le sualnak ngei loin a ser khawh ti cu tah, na zum kho hnga lo maw tiah ka thi than tikah, tlawmpal a ruah hnu ah aw ka zumh ko, hi kong cu ka rak ruat bal lo. A si tak ko tiah a ka leh. Ka u nangmah cu naa rel ngai ko, micheukhat hna nih cun Nu Mary nan biak ti tiang pei an kan ti cu ka ti ve I kan nii i, bia dangdang kan chim than. Bawinu Mary sual ngeilo in fa a pawi i a hrin ti mi bia cu vawlei mi nih kan zumhnak le kan zumh lonak ah hram aa bunh mi siloin Pathian biatak cungtu ah hram aa bunh mi a si ti kha zeitikhmanh ah philh hna hlah u sih. Profet hna chim mi biatak hna lakah pakhat cu hi bia hi a si. Fa a pawi lio minu pakhat a um i Fapa a hrin lai. A min ah Emmanuel sak a si lai (Is 7:14) tiah rak chim chung cang a si. Cun “Vancung mi Gabriel nih khan Mary cu Thiang Thlarau kha na cungah a phan lai. Pathian thawnnak cu na cungah aa fu lai. Pathian nih a tuah khawh lo mi thil zeihmanh a um le tiah a rak ti (Lk 1:35,37). Pathian khuakhannak lo tinhning le a tuah mi thil khuaruah harnak hna a zum mi kan si cu a va sunglawi hringhran dah. Pathian nih a fimmi le cathiam mi hna sinah a thuhkanh mi hna kha kannih sinah a langhter cang caah Pathian cu thangthat hna u sih.

A ngaingai ti ahcun zumhnak hi Pathian pek mi laksawng a si kha philh hlah u sih. Zumhnak ka ngei aa ti mi Khrihfa mi tampi hna nih, Nu Mary sual ngeilo nu, Pathian nu a sinak le mi vialte lakah thluachuak minu a sinak an zumh khawh lo cu a tling mi zumhnak Pathian nih a pek hna lo caah a si kho men ko. Micheu cu Bible Sianginn sangsang an kai i Pathian rian an tuan. Cheukhat cu Khrihfa upa Nu upa le mino upa hna kan tuan. Cu tikah sual ngeilo, miding mifel, a thianghlim ngai mi ah kan i ruah theu tawn. Sihmanhsehlaw Bawi nu Mary tu cu zei ah kan rel lo i sual ngei lo in a thiang mi Nu a si ticu kan zum duh hlei lo. Asinain Nu Mary nih cun aho mi hmanh thleidang loin a kan dawt dih ko ti cu Pathian bia tak a si.

Mary cu Pathian nu a si. Elizabeth cu Thiang Thlarau in a khah hnu ah, zeicahdah ka Bawipa nu nih kei te hna hi na hun ka tlawn (Lk 1:43) tiah a rak ti. Thiang Thlarau a co mi vialte hna nih cun Mary cu ka Bawipa i nu ka nu tiah an ti khawh cang lai. Jesuh cu ka Bawipa a ti i, Bawinu Mary kha ka Bawipa nu ka nu tiah a ti khawh lo ahcun Thlarau fa tling a si lo tinak a si. (Biathlam 12:8) ahcun “Minu nih miphun vialte thirfung in a uk tu ding Fapa kha a hrin tiah a ti, Mary cu hi vawlei ahhin amah he tahchunh awk minung an um lo, zeicahtiah Pathian nih a Fapa ngeihchunh hrin awk ah a thim mi a hleice thluachuahnak a pek mi, hramthawknak le donghnak Nu a si. 

Hi ruangah hin Vancungah cawinak a hmuh i, a thuam ah Nika a si, thlapa kha a kedan a si i, a luchin cu Arfi hleihnih kha a si. (Bia 12:1) Kannih cu vawlei ah nu kan rak ngei, asinain atu ahcun hringtu nu a ngei ti lo mi kan um lai. Sihmanhsehlaw a zungzal in thlarau lei ah Nu kan ngei cang. Amah nih cun kan caah thla za a kan campiak zungzal i lam ding kha a kan cawnpiak. A sin ah bawmh hal in thlacam law, i bochan tuah. Upatnak pe law,dawtnak in amah cu zoh tuah. A tak a si mi Nu dawtnak in a rak luang mi vel thluachuah cu na hmuh lai. Na thil rit an chawn lai I hna ngamnak lawmhnak le dinnak kha na co lai. Ka Nu ka bawm law na Fapa kan Bawipa Jesuh bantukin ka cohlang hram ko tiah Bawinu Mary a au thiam mi fa si i zuam hna u si... Amen