Zeibantuk Rul nih dah a kan CUK. . .

Dawtmi u le nau nan dihlak cungah Pathian Thluachuah um ko seh.

Avoi (1) nak, -  Numbers 21:4-9

Thawngthabia - John8:21-30

Nihin kan theih kan rel hnga dingmi cathing hna chung in thlarau lei in ruat ti hna u sih.

Bawipa cu zeizong vialte (give)a kan pe tu le (forgive) kan sualnak a kan ngaithaim tu a si.

Kan nih minung a si mi hna belte cu a hal lawng a hal thiam i (get) kan hmuh tikah (forget) philh a hmang mi kan si tawn.

Bawipa nih Israel mi hna sal taannak Izipt ram in a chuah hna i Khuaiti le cawhnuk in a luang mi ram Canaan ram lei a hruai lio hna zongah, thet-se ramah Israel mi hna nih Bawipa cungah hneksak nak le a sal Moses cungah mawhchiatnat tampi an rak tuah.

Ei awk an ngeih ti lo caan ah Bawipa nih vancung in changreu (rawl) arak pek hna. Sihmahsehlaw, mi hna nih changreu lawng an ei tikah a dang phunkhat an duh tthan. Bawipa nih sa zong a rak pek hna.

Khual an tlawn lio ah an ti a hal tikah Bawipa nih Lungpi chungin ti a chuahter i an ti hal a riam ter hna. Sihmahsehlaw, minung hna nih Bawipa le a sal moses cungah mawhchiatnak le sualphawtnak lawng tein an rak zaihnawh hna. Cu tikah, Bawipa nih an lak ah meirul kha a rak thlah i cu rul nih cun a cuk hna i Israel mitampi cu an thi, tiah avoi (1) Bible relnak chungah kan hmuh.

Israel mi hna nih kan sual cang ti an i theih tikah Moses sinah an ra i Pathian sinah thla kan campiak ko tiah an nawl tthan. Cu tikah Bawipa nih a chim bangin Moses nih dar-rul pakhat kha a ser i tung cungah a tar mi a zoh mi paoh nih damnak an hmuh tthan.

Hi konglam hi ruat tti hna u sih. Tuchan ah zeibantuk rul nih dah a kan cuk cio tawn. A kan cu tu rul kan i thei cio hna maw? Tahchunhnak ah rul bantuk a si mi micung uk duhtuknak lung put te hna, uk khawhnak nawl ngeih duh tuk te hna, mi chiatnak kong lawng chim le ceih te hna, zu din lo in um khawh lo te hna, kuak zuk lo in um khawh lo te hna, hibantuk tthatlonak rul nih a kan cuk cio ti hi i thei hna u sih.

Jn 8:21 chungah Bawipa nih a chim bangin “Nan nih cu nan sualnak chungah nan thi lai” tiah a ti bangin a kan cu tu rul hi zeibantuk rul hna dah an si ti kan i theih lo ah cun, Dar rul a zoh lo mi Israel mi tampi an thih bangin kan sual nak chungah kan thi ve sual hna lai. A kan cu tu rul kan i theih a si ah cun Moses tar mi Dar rul a zoh mi paoh nih damnak an hmuh tthan bangin, Bawipa kha zoh hna u sih. Pathian a kan cawnpiak mi thil lei le a  Bia lei ah kan mit hoih hna u sih. Kan zoh ah cun Thlarau damnak kan hmuh tthan ko hna lai.

Rul cuknak hma he Dar rul a zoh mi paoh nih damnak an hmuh tthan bangin, kan sualnak kan palhnak i theih in sual ngaihchihnak tuah, sualthlahnak tuah in Pathian sin kan kir tthan a si ah cun kan Thlarau cu a dam tthan ko lai. Bawipa le a vailam tung kha zoh hna u sih.

A dam mi Thlarau ngeih khawh i zuam cio zungzal hna u sih.