A kan luattertu Pathian

Nan dihlak cungah Pathian nih Thluachuah in pe ko hna seh.

Nihin kan ruah hnga dingmi ah biatlang pi bunh ka duh mi cu “A kan Luatter tu Pathian” ti a si.

Avoi (1) Bible relnak cu Daniel 3:14-20;24-25;28 a si.

Thawngthabia – Jn 8: 31-42

Avoi (1) Bible chungah kan hmuh mi cu mino pathum “ Shadrak, Meshak le Abednego” ti mi tlangval no Pathum kong a si. Hi mi no pathum hna nih Siangpahrang Nebukhadnezzar nawl chuah mi milem hmai ah kun i biak ding an rak el i,  an biak mi Pathian pakhat lawng lawng kan biak lai tiah an rak ti. A thi zong thi ko u sih. Na ser mi milem hmai ah cun kan kun lai i kan bia kho lai lo tiin an Biak mi cungnungbik Pathian cungah zumhfek in an um nak kong  a si.

U le nau hna, tuchan ah zeibantuk milem biak awk ah dah kan thinlung lemsuai kan si cio hna hnga?

Minung cu tak sa he a nung mi kan si caah, kan pawcawm nak ca le kan i hruk kan i aih ding caah hmunkip ka kip ah chawva kawl ah kan kal cio hna. Tahchunhnak ah, hlan deuh ah cun, kan khua kan ram kan chuah tak hna i, kuli hlawh ah Mizo ram lei kan rak panh tawn. Cun Kachin ram lei ah suikhur cawh ah kan rak panh tthan hna. A hun um tthan i Malay lei in ram lian ram tthatnak lei ah kan khua kan ram kal tak in kan panh cio hna.

Chawva le phaisa zong hna zonghi Kan nun pawcawnak pehkhawh nak ding caah a herh tak tak mi a si ko. Cu ruangah chawva kan kawl cio hna i rian zong kan ttuan cio hna. Hi chawva hna nih lungdaihnak a kan pek kho tak maw? Hi chawva hna nih kan thlarau khamh a si nak hnga caah zeitluk in dah rian a ttuan khawh ve? Vawlei cung kan um caan a dih tikah tah kan i kalpi khawh hnga ding mi an si hnga maw? Ruat cio hna u sih.

Tlangval no pathum hna nih an mah nunnak nakin an zumh an biak mi Pathian u sa an pek deuh hi zeiruang ah dah a si kan ti hnga? Annih nih an biak mi Pathian cu a kan sertu a si, nunnak a kan pe tu le khamhnak a kan pe kho tu a si ti an rak theih an rak zumh caah a si. Saltan nak in a kan luatter tu, ral phun zakip in a kan khamh kho tu le kan nunnak a kan pe tu a si ti an zumh caah a si.

Tlangval no hna nih Pathian an i bochan bantukin kan nih hna nih tah Pathian kan i bochan ve maw? Annih nih a hman mi Pathian an i bochan caah cu Pathian nih cun tih nung mei phu chungin a rak khamh hna khah.

Bawipa nih a ti mi cu: “ Keimah hi lam le biatak le nunnak ka si” (Jn14:6) ah a ti.

Nihin Thawngtha kan theih mi chungah Bawipa nih: “biatak cu nan hngalh lai i biatak nih cun an luatter hna lai” (Jn 8: 32) ah a ti.

Mithiang Thomas Aquinas zongnih a rak chim ve mi cu: “pumsa nih a theihthiam lo mi, zumhnak nih a kan hngalhter” tiah a rak ti ve bangin, Biatak a si mi Bawipa Pathian cun tlangval pathum nih an zumhnak in an rak hngalh taktak. Kan nih hna zong nih cu Biatak cu kan zumh, kan hngalh taktak a si ah cun nifatin kan tuan kawl hawlnak ah hin Biatak a si mi Bawipa duh ning in a nung zungzal kho tu kan si cio ko hna lai.

Biatak a si mi Bawipa cu kan harsatnak in a kan khamh kho tu, a kan luatter tu le a kan tlanhtu a si. Biatak a si mi Bawipa Pathian cungah zumhfek tein i bochan zungzal hna u sih. Zeicah tiah cun Amah lawnglawng hi a kan temtawntu thihnak hri sualnak chungin a kan luatter kho tu a si caah a si.