Pathian thluachuah rel thiam

Nihin kan relmi thawngṭhabia thiang (Mark 8:14-21) kan zoh a si ahcun zultu hna nih khual an tlawnnak ah an ei ding mi chuncaw an i rawnh lo nak, asiloah chuncaw an philh nak kong in aa thawk kha kan hmuh khawh: “A zultu hna nih khan changreu phorh an philh I lawng chungah cunt lang khat lawng an ngei.” An sinah a ummi cu changreu hlumkhat te lawng a si. Hi changreu hlumkhat nih hin zeitindah an dih lak khim tein ei ding in cun a zaat khawh hna lai?

Jesuh nih an eidin ding caah zeihmanh phannak um loin ralrin bia tu a chimhmi hna cu, “Farasi mi hna thilnu le Herod thilnu kha i ralring u,” tiah a ti hna. Cu tikah annih nih, “Changreu kan ngeih lo caah pei hitin a kan ti ko hi,” tiah an i ceih. Jesuh nih an i ceihmi a hngalh caah, “Zeicahdah changreu nan ngeih lonak kong cu nan i ceih len ko? Nan ka thei kho in nan hngal kho rih hrim lo maw? Cuticun maw nan lung a pin ko? Mit nan ngeih ko ṭung, nan hmu kho lo maw? Hna nan ngeih ko ṭung, nan thei kho lo maw?” tiah a ti hna. 
Jesuh nih zultu hna kha an sinah thluachuahnak vialte a hrampi a simi Amah hrimhrim a um ko kha an theih khawh lo ruangah a mawhchiat ko hna. Kannih hna hi teh Jesuh nih a kan mawhchiat ve hnga maw? Mah duhnak lawng ruah, theih i thil dang vialte philh dih phun in kan um tawn ve maw? Kan duh mi lawng theih in Pathian thluachuah kan cungah a um zungzal ko timi kha kan philh ve tawn maw? Mah paw khim nak ca lawng le taksa duhnak lawng kan ruah sual a si ah cun Jesuh nih a kan mawhchiat ve sual lai.

Nihin Missa raithawinak chungin kan relmi cathiang Mark 8:14-21 kha thuk deuh tein ruat cio hna u sihlaw, Pathian sinah lawmhnak bia chim thiam hna u sih. Mah duhnak lawng kha theih loin Pathian nih a kan pek mi laksawng, thluachuah hna kha theihthiam in Pathian sinah lawmhnak bia chim thiam hna u sih.