Pathian cu a kan pehtlai zungzal tu a si

Nihin Missa raithawinak chungah kan relmi cathiang hna cu (Genesis 9:1-13; Mark 8:27-33) hna an si. Voikhat nak Bible thiang chungah Noah le a chungkhar hna, cun sermi thil hna cungah a thar in Pathian nih thluachuahnak a pek hna nak kong a si. Noah cu hramthawhnak i hmelchunhnak a si. Pathian nih Noah le a chungkhar hna hmangin sermi thil hna cungah thluachuahnak a thar in a pek ṭhan hna. Pathian nih Noah sinah thluachuah bia a chimmi hna zong hi Adam le Eve hna sinah a rak chim bangin a si (Genesis 1). Adam le Eve kha thluachuahnak a rak pek hna bangin ‘tuah ding le tuah lo ding’ ralrinnak zong a rak pek hna. Pathian in Noah le a chungkhar tefa hna sin zongah thluachauhnak a pek hna bangin rawhralnak le sual-palhnak lam an zulh lonak hnga ding caah ralrinnak a pek hna. 

Pathian cu amah nih sermi thil vialte hna he pehtlaihnak a ngei zungzal ko. Minung hna nih sual-palhnak lam kan panh sual a si zongah i ngaihchih ṭhan in le amah sin kir ṭhan dingin a kan kawh zungzal ko, a kan hngah zungzal ko. 

Jesuh Khrih zong, amah hrimhrim nih a rak thimmi a zultu hna he khan pehtlaihnak a ngei zungzal ve timi kha Biakamthar Bible cathiang chungah kan hmuh khawh. Jesuh Khrih si ning tak thei loin zultu hna zong nih Jesuh Khrih kha an rak zulh sawh men ko lai. Cucaah Jesuh nih, “Nannih nih tah aho a si, nan ka ti dah?” tiah a rak ti hna. Peter dah ti lo cun zultu dang ahohmanh nih Jesuh bia kha “cu tin, kha tin an leh” timi kan Bible thiang chungah kan hmu lo. Jesuh Khrih sining tak kha “Messiah na si” tiah a rak phuangtu Peter hmanh nih a thei kho lo. Sihmanhsehlaw Jesuh Khrih nih cun amah a sining tak le a mission cu zei a si timi kha a kan theihter ṭhan lengmang ko. “Taksa mit le ruahnak lawng in Jesuh Khrih kha zoh lo ding le ruah lo ding a si” timi kha nihin kan relmi thawngṭhabia thiang chungah hmuh khawh a si. Jesuh Khrih sining tak kha kan theih, kan hmuh khawhnak hnga ding caah Jesuh kha “thlarau mit in kan zoh” zungzal a herh. Jesuh Khrih cu amah a zumtu hna le sermi thil vialte hna he pehtlaih a duh zungzal mi Pathian a si ko.