Thimding

Deuteronomy 30:15-20 chungah kan hmuh mi cu Pathian nih a miphun hna sinah kan pek hna lai tiah a rak timi ram an phanh hlaan ah Moses nih zeidah i thim awk a si timi bia a chimh hna nak kong a si. Pathian nih a kamhmi hna ram chung an luh tikah cun Israel mi hna nih thim dingmi thil tampi an ngei te lai caah, ramcar chungah a rak hruaitu hna le a rak kilveng, a rak zohkhenh zungzal tu hna an Pathian hmanh kha an philh te lai. Za long tein le mah duh ning in an nun tikah cun an i thimmi le an zulhmi phunglam ning in biaceih an si te lai. Nunnak Pathian an i thim a si ahcun an nung lai i sualnak lam an zulh a si ahcun (thihnak an i thim a si ah cun) an thi lai timi kha Moses nih rak chimh mi hna cu a si. 

Isarel mi hna zong nih an nunnak ah an i thimmi hna hi zeidah an si timi kha ṭha tein an i fian a herh bangin an i thimmi a theipar (consequences) zong zun ding tiang in nawl pek an si. An i thim bangin pek an si te lai. Nunnak an i thim a si ah cun an nung lai i thihnak (sualnak) an i thim a si ah cun an thi ko lai. Cucaah Moses nih hitin a ti: “Zohhmanh, nihin ah nannih hmaiah nunnak le ṭhatnak, thihnak le vanchiatnak kha ka chiah”(Deut 30:15). Isarel mi hna nih an i thim ding mi cu “thihnak maw, asiloah nunnak maw” ti kha a si ko. An i thim bang in pek an si ko lai. 

Thawngṭhabia (Lk 9:22-25) chung zongah Jesuh nih hitin a ti ve: “Ahohmanh nih zulh nan ka duh ahcun mah zawnruahnak kha nan ngol lai i nifate in nan vailam kha nan i put lai i nan ka zulh lai. Zeicahtiah mah himnak lawng a ruatmi cu a nunnak kha a sung lai sihmanhsehlaw keimah ruangah a nunnak a sungmi cu khamhnak kha a hmu lai,” (Lk 9: 23-24) tiah a ti. 

Nihin Missa raithawinak chungah kan relmi cathiang hna nih an kan cawnpiak duhmi biathli (message) kan funtomh a si ahcun “Nunnak maw kan i thim lai, thihnak dah?” timi kha a si ko. Nang zeidah naa thim ve lai?