LUNGNGETNAK BAWI (TTP)

THIANG THLARAU PATHIAN CU PUMKHATTE SINAK, LUNGNGETNAK BAWI

          Bible chungah kan hmuhmi cu: “Veel laksawng a phunphun a um nain Tharau pakhat lawng a um” (1Kor. 12:4). Hi thil vialte a tuahtu hi Thlarau pakhat asi, a duhning bantukin mi kha laksawng phun dangdang cio a pek hna (1Kor. 12:11). Kannih vialte hi Thlarau pakhat nih tipilnak a kan pek cio. Kan dihlakin Thlarau pakhat kha din awk ah a kan pek (1Kor. 12:13). ^{Saya Judson nih a letmi Kawl bible ahcun  “We were all given to drink of one Spirit” kha ...  Hika zawnah timi biafang cu pakhatte asimi a thiangmi Thiang Thlarau Pathian kha a sawh lo. Minung thinlung thlarau lawng kha a sawh.}

          Khamhnak biatak leiah kawhnak he pehtlaih mi ruahchannak pakhat lawngah nannih cu auh nan sibangin pum pakhat (Bupi pakhat), Thiang Thlarau pakhat lawng a um. Bawi pakhat, zumhnak pakhat, Tipilnak pakhat lawng aum, zeizong vialte le kannih vialte Pa asimi Pathian pakhat lawng a um (Efs. 4:4-5).

          Thiang Thlarau Pathian cu thiannak hrampi asi. Pathian i dawtnak zong asi. Lungnget lungrualnak le hmunkhatte sinak i Bawi zong asi fawn. Thiang Thlarau Pathian cu lungnget lungrualnak le hmunkhatte sinak i Bawi a sinak kong kha mithiang Paul nih pum pakhatte he tahchunh in a cawnpiak hna. Mithiang Paul cawnpiaknak cu:

“Pum pakhat teah nge tampi a um i, hi pum pakhatte i nge tampi hna cu pum pakhatte an si bantukin, Khrih zong cubantuk a si ve. Aruangcu Judah mi siseh, Jential mi kan si ah, sal kan si ah, mi luat kan si ah kan dihlakin Thlarau pakhat nih tipil a kan pek i kan dihlakin Thlarau pakhat kha din awk ah pek kan si (1Kor. 12:12-13).  Hi Bible kha mithiang Paul nih biapibik in a cawnpiak mi cu; Thiang Thlarau Pathian cu ṭhenṭheknak Bawi le hrampi asilo, bu ṭhenṭheknak hna i Bawi le a hrampi zong asi fawnlo.

          Minung chuahkehnak kokek aalo lomi si tawnnak in umnak hna, a raang a nak, sendum titvun ilawhlonak hna, vawlei hmunpi ṭhennak ruang i a chuakmi ilawhlonak hna le minung pakhat le pakhat riṭhennak in a ṭhenmi ri hna kha Khrih ah peh in a komhtertu Bawipa cu Thiang Thlarau Pathian asi. Miphun a thleidan mi “Ri” hna, miphun a thleidanmi ‘ri’ hna kha a hrawk i, Khrih ah pumkhatte sinakin pehtlaih a fonhter i a komh hnuah pum pakhatte sinak a sakmi Bawipa asi. Jesuh Khrih a zumh taktak mi cu Thiang Thlarau Pathian thawngin pumkhat asimi Bupi pakhat ah sernak a ing.

          Khrih pum pakhat ah a pumh i a tonmi Bupi cu vawlei caandongh tiangin khamhnak thawngṭha kha a chim a cawnpiak hna lai pinah, thihnak kutka hna asimi khuachia dohnak hmanh nih, cu Bupi cu a tei kho lailo (Mt. 16:15-18). Khuachia i dohnak hna cu adikmi zumhnak in apalh, apialter mi, apalhmi zumhnak le cawnpiaknak hna an si. Bianaah, Jesuh Khrih hi Pathian asilo, a hleikhunbik mi minung sawhsawh asi tiah cawnpiaknak le zumhnak hna (Arianism), Thiang Thlarau cu Pathian taktak asilo, hmuhkhawh lomi ṭhawnnak huham he a khahmi sertu Pathian he aa naihbik sermi pakhat asi (Pneumato-machianism) cawnpiaknak le zumhnak hna, Khrih cu Pathian asi i a thikho bak lomi asicaah, vailam cungah a thilo. Asinain amah aiawhmi pakhat nih thihnak a inpiak timi cawnpiaknak le zumhnak hna tiah apalhmi zumhnak le cawnpiaknak hna cu chan a pehpeh ah a chuak.

        Cu zumhnak palh hna kha doh in teikhawhnak caah Khrih hrimhrim nih bia a rak kamhmi pumkhatte le pakhatte asimi Bupi (Mt. 16:15-18) kha Thiang Thlarau nih zungzal in a sak ko timi fiangtein a lang.

        Bawipa Jesuh Khrih hrimhrim nih a rak dinhmi Bupi cu pum pakhatte asi timi va hmaan sehlaw, Thiang Thlarau Pathian cu, kha Bupi pakhatte kha a saktu, hmunkhatte asiter mi inn muisam suaitu le cu Bupi pakhatte i nunnak thihripi le nunnak petu Bawi (Giver of Life) asi. ^{6. John Paul II, “The Spirit of Unity” in the Spirit: Giver of Life and Love, 325.}