THLANKHAR LUNG

VANMI NIH THLANKHAR LUNG AN THAWN

Bible biafang ningtein “Vanmi” ti cu “Thlahmi” tinak asi. Pathian nih a thlahmi tinak asi. Pathian nih vanmi kha a thlah i abiapi mi thawng a thanhter. “Pathian nih vancung mi Gabriel cu Galilee ram khua pakhat Nazareth timi ahcun a thlah. Siangpahrang David hrinsor asi mipa Josef an timi he kan i ṭhi lai tiah bia aa kammi ngaknu “Mary” kha bia na va chimh lai tiah a fial. Vancungmi Gabriel kha Mary sinah cun a ra i “Na cungah daihnak umko seh. Bawipa cu na cungah a um i thluachuahnak tampiin an pek” tiah a ti. Cun “Mary, na thinphang hlah zeicah tiah Pathian nih nangmah cu veel an ngeih. Nau na pawi lai i fapa na hrin lai i a min ah Jesuh na sak lai. Amah cu milian mingan asi lai i cungnungbik Pathian Fapa ti asi lai” tiah a ti. Vanmi nih Abraham sinah an chim, Moses sinah an chim i, midang sin zongah an chim ve. Hmailei a cang hngami profet hna i chimchung bia hna kha an fainter hna. Samson hrin asi lainak, tipil petu Johan hrin asi lainak le Jesuh kong thengte zong a phuan. Cu vialte an phuanmi thawngpang hna vialte lakah abiapi cemmi an phuanmi cu “A THO CANG” ti hi asi.

Vanmi nih ra riangmang in thlaan lungkhar an thawn tikah Jesuh a chuak kho lailo an ti caah asilo, mi vialte nih thlaan chung an zoh i, Jesuh a thoṭhan taktak ko, thlaan chungah a um tilo ti an hngalhnak hnga caah asi. Cu rian cu vanmi hna nih an i nuamhpi ngaimi asi. Cuhlan deuh, ni tlawmpal ah khan vanmi ralkap bupi hna cu Jesuh an hrem lioah hnulei tawn fial an si. Zeicah tiah Jesuh chanh lo dingin asi. Atu cu thlaan chungah vui asilo bantukin thihnak a tei i thlaan in a chuak cang. Cu kong cu vanmi nih an thanhmi cu asi.

Vawlei a hnintu ṭhawnnak mit a cerh tukmi ceunak he vanmi nih lungpi cu zaang tukin an thawn lai i, ṭhutdan ah an hman lai tiah a thanh nan theibal mei? Thlaan cawngtu ralkap pawl an i teng dih. Pathian minung, nu hna nih “A tho cang” tiah an thanh ve.

Zarhkhat chung ni hmasabik an phak fate, cu thawng cu athar in a ringpeng. Zarhpini paoh cu Jesuh thawhṭhan conglawmh ni asi zungzal ti hi philh hlah usih!