Pope Francis nih Gelora Bung Karno Stadium (Jakarta, Indonesia) Missa chungah a chimmi Bia

Pope Francis nih Gelora Bung Karno Stadium (Jakarta, Indonesia) Missa chungah a chimmi Bia

Jesuh he tonnak nih a zultu si khawhnak ding caah lungput pahnih i nunpi dingin a kan auh. Pakhatnak lungput cu bia ngaih a si i, pahnihnak cu bia i nunpi a si. Pakhatnak ah, bia ngaihpiaknak ka ti.  Zeicahtiah zeizong vialte cu ngaihpiaknak in a chuakmi a si. A hawikomhnak laksawng sunglawi kan cohlanak cu amah sinah kanmah le kanmah kan i phuannak in a chuakmi a si. Cu tikah kan cohlanmi bia kha nunpi a herh. Cuticun kanmah le kanmah kan i hleng lai lo (cf. Jam 1:22). A ngaingai ti ahcun, an hna lawng in ngaih awkah aa zuammi hna nih bia thlaici kha an lungthin chungah a um ter lo i an ruahnak le an tuahsernak kha an thleng kho lo. Pekmi bia kan ngaih mi thawngin bia cu kan chungah a nung i kan nun lam kha thlen a duh.

Thawngṭha kan phuanmi nih a biapimi lungput pahnih: bia ngaih le bia nunpi awk ah ṭha tein ruah ṭhan ding a kan bawmh.

Pakhatnak ah, bia ngaihnak. Thawngṭha ttial tu nih “Mi tampi nih Pathian bia theih awkah amah cu an buthnawh” (Lk 5:1) tiah a chim. Bawipa bia theih duhah mipi nih rawltam le tihal in an kawl i Jesuh sinin ai phuan kha an theih. Hi thil a cangmi nih hin, Thawngṭha cauk (Gospel) chungah voi tampi a chim tthanmi cu minung lungthin nih a tlingmi  lawmhnak pe khotu le a tlinter khotu biatak kha a kawl zungzal ti kha kan hmuh. Minung bia lawng in le vawlei ruahnak lawng nih minung lung a tlinh kho lo. Kan nunnak lam a ceuter kho tu vancung in a rami ceunak kha kan herh zungzal ko. Vawlei thil lianngan sin in si loin, ramcar ah ti a halmi hna an til hal a riamter khotu a nung mi ti bangin a dong kho lomi hnemhnak a kan pe kho tu a si. Kan khualtlawnnak ah Pathian lawng lawng nih a hmaanmi le sullam a ngei taktak mi nunnak lam ah a kan hruai khawh.

U le nau hna, zultu hna rian hmasa bik kha philh hna hlah usih. Cun kan nih zong kan dihlak in zultu kan si ve. Cun lenglei in a langmi tuahsernak men in nun ding a si lo. A hmasa bik kan rian a si mi cu khamhnak a kan khotu Jesuh bia kha zeitindah kan ngaih thiam hna lai ti kha a si. Thawngṭha chungah kan hmuhmi cu “Cu ka i a ummi lawng pakhat, Simon ta ah cun Jesuh cu a lut i tikam cun thlawm tein hei nam deuh u tiah a ti. Jesuh cu lawng chungah cu a tthu i mizapi kha a cawnpiak hna (cf. LK 5:3). Kan zumhnak nunnak cu toidor lungthin he Jesuh kha kan nunnak lawng chungah kan cohlan i hmunhma kan pek tikah le a bia kha kan ngaih i kanmah kanmah biahalnak, zuamcawhnak le thlennak kan tuahnak lawng ah khan aa thawk.

U le nau hna, Bawipa nih a kan hal mi cu a bia kan chungah taksa si dingin le cu bia cu i nunpi dingin a kan sawm. Bawipa bia kha i nunpi loin a chim lawng kan chim a si ah cun vanzuang bantuk men men kan si ko lai. Jesuh nih tilawng chungin mibupi sinah phung a chim dih hnuah, Peter leiah aa mer i, “Ti thuhnak leiah khin na lawng hi hei thawn deuh law na sur khan nga kha chep hna” (c. 4) tiin Peter nih a Bawipa bia aa nunpi nak kha a hneksak. Kan zohning thlen awk le kan lungthin kha Khrih lungthin muisam ah thlen awkah a kan hal. Bawipa ni Thawngtha bia kha vawlei rili pi chungah raltha ngai in cheh, vorh ve ding in a kan sawm. U le nau hna, Bawipa bai nih ziaza thalo hna kha hrial in nunnak thar he nun ngam dingin a kan kawh ve. Khuachia nih cun a ttha lomi thil kha a duh. Cu a ṭha lomi thil le nunzia nih khan minung a kan hrawh khawh caah a si.

A ngaingai ti ahcun, Bawipa nih a kan auhnak kha alnak le i phettak nak tuah khawh zungzal a si ko. Peter nun zia kha zoh tthan hna u sih. Zaan khuadei nga pakhat hmanh tlaih khawh loin rili kam ah khan a um ko. A thin a hung, a tha a ba i a lung a dong. Sihmanhsehlaw kutlawng in a umnak le a tlamtlin lonak nih tlaknak lei ah a phakter lo.  Peter nih hitin a ti: “Bawipa, zan khuadei kan vorh ṭualmal ko nain zeihmanh kan tlai lo. Sihmanhsehlaw ti ko u, na ti ahcun sur cu kan cheh rih ko lai” (c. 5). Na bia bangin sur cu kan cheh ko lai. Cutikah, theih bal lomi thil khuaruahhar pakhat a hung cang. A cang mi cu, tilawng cu nga in a khah tuk caah a pil dengmang (cf. v. 7).

U le nau hna, nan sinah chim ka duh mi cu, khuaruahhar le a phunphun in a ummi tikulh hna sinah, nan tilawng mawngh kha ngol hlah u. Nan sur cheh kha ngol hlah u. Nan chunmang manh kha ngol hlah u. Daihnak rianṭuannak ah khan nan thazang baatter hlah u. Nan lak ah rothil taktak a simi unau sinak kha i ruahchan ngam zungzal ko u. Bawipa bia lamhruainak thawngin, dawtnak thlaici tuh ding, biaruahnak(dialogue) lam kha zumhnak he kal ding, na sining tein na ngeih mi zaangfahnak lungthin langhter zungzal ding ah le mithmai panh tein um khawh zungzal dingin thazaang kan pek ko hna. Mithmai panh tein a ummi nan si tiah an in ti bal cang maw? Zaangfahnak tein, na mithmai panh kha hlo hlah. Cun hmailei ah kal peng ko! Cun daihnak sertu le ruahchannak sertu si zungzal ko u!

Naite ah khan ramchung um Bishop hna nih Indonesia mipi hna sinah “Zatlang nun le Khrihfabu caah hmunkhat ah kal ṭi u”timi chimh ka duhmi pakhat an langhter. Ruahchannak sertu si hram ko u. Lungdonghnak si loin ruahchannak sertu, a dong kho lomi lunglawmhnak lam ah a kan hruaitu, ruahchannak Thawngṭha bia kha ttha tein ngai zungzal ko u (cf. Rom 5:5). Kaa Lawm tuk.

https://bitly.cx/0VdDR