CARDINAL CHARLES BO I VELANKANNI PHUNGCHIMNAK

Myanmar ram Cardinal Charles Maung Bo nih, September ni 8, Velankanni Bawinu Puaini phungchimnak ah, mipi nih a tuar cuahmahmi harnak hna lakah daihnak, damnak, le lungrualnak kawl dingin zumtu hna kha a forh hna.

Cardinal nih Ngaknu Thiang i nawlpiaknak a auh i Myanmar ram damnak le rumnak caah thlacamnak a tuah.

"Nihin ah kan upatmi Daihnak Siangpahrangnu nih Myanmar ram ah zungzal daihnak tlungter hram ko seh." Amah cu harnak a tongmi vialte hna nu a si. Kan intuarnak a hngalh i nihin ah amah i karlak bawmhnak kan hal," tiah a ti.

Naiteah India ram Velankanni biakinn a kalnak kong kha a ruahṭhan, cu caan cu "thlarau lei tharchuahnak thukpi" caan tiah a ti. A tlawnnak ah Myanmar ram mipi caah thla a cam piak hna.

"Atu hmanhah, mi thong tampi cu Velankanni Biakinn (lungdon) ah an i pum i khuaruahhar in a tawnghnak kha an kawl. " Zumtu mikip nih an upat, zeicahtiah amah cu Cana khua nupi thitnak puai ah a rak tuah bantuk tein a Fapa sinah nawlnak a tuahtu a si," tiah Cardinal Bo nih a chim.

Thawngtha chung i Mary nunning zong kha a ruahṭhan i, a zohchunhmi kha Myanmar ram i zuamcawhnak hna he a pehtlaihter. Cardinal Bo nih ‘Magnificat’ timi kha Mary nih sifak le hremnak a tongmi hna caah Pathian i dinnak a phuannak kha a langhter.

"Mary i Magnificat (Thangṭhatnak Hla) nih Pathian cu a niammi hna kha a hngalh peng hna i, a niammi hna kha cawisan awkah thazaang in rian a ṭuan ti kha a kan theihter," tiah a ti.

Cardinal nih cun zawnruahnak le rianṭuannak caah a auh hna i, zumtu hna kha Mary i a rianhnak nunlam kha zulh dingin thazaang a pek hna, i "thilri bawmhnak in siseh, hnemhnak bia in siseh, lungrethei in a ummi hna he umṭinak in siseh, Mary i lungput kha kan nunnak ah kan langhter khawh," tiah a ti.

Myanmar ram ah hringtu nule hna nih an tonmi harnak hna kha a cohlan, an lak ah buainak le ralzaam (umhmun thial) mi tampi an um a ti.

Amah nih hi nu hna caah thlacam a herhnak le Mary i karlak thlacam piaknak thawngin hnemhnak a kawlpiak hna, Vailam cung a intuar lioah a Fapa pawngah Mary cu a dir tiah amah nih a langhter.

Cardinal Bo nih zumtu hna cu ahleicein harnak caan ah, Mary i karlak thlacam piaknak kha bochannak chiah dingin a forh hna.

Amah bawmhnak a kawlmi hna cu thluachuah le khuaruahhar thil he an i tong, harnak an ton tikah ruahchannak le hnangamnak an pek hna tiah a chim.

"Nichuahlei Lourdes" tiah theihmi Velankanni Bawinu Puai an tuah lioah, Cardinal nih zumtu hna cu Myanmar ram mi tampi caah ruahchannak a chuahpi mi kong a theihter hna.

Miphun caah daihnak, dinnak le damnak a um khawhnak hnga Mary i thlacam piaknak hal buin thlacamding a sawm i a phungchim mi a donghter. 

*Licas news in kan lakmi asi.