Mithiang James

July, 25

ST. JAMES (LAMKALTU)

            Bible `ialtu lamkaltu mithiang Johan i a u a simi mithiang James cu lamkaltu hna chungin a min aa khatmi pakhat pa he thleidan khawh dingah (St. James upadeuh) timi min kha an pek. St. John le St. James unau pahnih hna cu an pa Zebede he nga an tlaih lioah Jesuh nih a rak auh hna (Mt; 4:19). Bawi Jesuh cu anmah i an thintawinak ruangah Bonerges (khuari fahna) ti mi minthar a sak hna (Mk; 3:12). Biana ah kan chim ahcun Samaria khua pakhat ah Jesuh kha tlun inn an onh lo tikah an unau in an thin a hungtuk i Jesuh kha “Bawipa, hi mi hna hrawhnak ding caah hin Vancung in mei au u tiah na kan duh maw?” tiah an hal (Lk; 9:54). Thiang Thlarau a `um hlantiang (Penticost hlantiang) an zumhnak a rak der. A fale pahnih hna kha `hatnak hmuhter a duh hna caah a nu nih Jesuh sinah a ratpi hna i “Siangpahrang na si tikah ka fapa pahnih hna hi na orhlei le na kehlei ah an `hutnak hnga, bia ka kamh law ka duh” tiah a hal (Mt; 20:22).

            Mithiang James, Peter le Johan hna cu Jesuh nih Tabor tlang cungah a muihmel aa thlen tikah hmuhnak nawl a ngeitu hna kha an si (Mt; 17:1). Mithiang James cu lamkaltu hna chungin a hmasabik thihnak a ing mi a si. Amah cu 44 kum, Herod Agrippa I chanah an tlaih i thihdan an pek (Lam; 12:2). Amah i a ral `hatnak ruangah amah a thattupa cu Jesuh kha a zumh i amah he a lu aa tan ve. Hlan pupa tehte ningin cun St. James cu mah chan lioah vawlei deng tiah an ti mi Spain ram Santiarodicanpostella Biakinn ah an `hial bantuk a si i chanlai thawkin mah hmun cu Pathian biak an kal nak hmun ah a rak cang.