ZARHKEL (23) NAK ZARHPINI

Voikhatnak Bible - Ez. 33:7-9

Salm - 95:1-2, 6-9 (leh.95:8)

Voihnihnak Bible - Rom.13:8-10

Thawngttha bia - Mt. 18:15-20

PHUNGCHIM DING AMURU

• Pathian nih minung vialte khamhnak kan hmuhnak ding caah Bupi a ser i mah Bupi hi Innchungkhar pakhat ah a kan ser tthan. Hi Innchungkhar hi daw le rem tein um hna seh ti hi Pathian duhnak nganpi a si.
• Khrihfa bu chungah thlarau lei dam lonak a um pah ttheu tawn; mah dam lonak hna cu, khat le khat lung rual lonak le i rem lonak a chuah ruang ah biakinn panh duh ti loin a um mi kan um pah ttheu tawn. Mah bantuk kha thlarau lei dam lonak phunkhat a si. Hi bantuk zawtnak a um lonak hnga ding caah pakhat le pakhat unau chuahpi dawtnak bantuk in khat le khat i chimhhrinh ding a si.
• Thlarau lei zawtnak damh khawh dingah lam pahnih a um. Mah lam pahnih hna cu, dawtnak in i chimhhrinhnak le thlacam piaknak an si. Hi bantuk damnak rian`uannak ah siangbawi te le saya te rian lawng a si lo. Kanmah Khrihfa pakhat cio nih rian kan ngei dih.
• Mipa pakhat nih tuu zakhat a ngeih i mah chungah pakhat te a tlau sual ahcun sawmkua le pakua kha tlangcungah chiahtak riangmang in a tlau mi pakhat te kha a hmuh hlan lo a kawl... ti mi kan theih bal bantuk in, vancung a um kan pa zong a fale vialte hi pakhat hmanh tlauter a kan siang ve hrimhrim lo.
• Peter nih Jesuh bia a hal mi kha, Bawipa kan unau hna nih kan cungah an sual ahcun voi zeizat dah kan ngaihthiam hna lai, voi sarih maw kan ngaihthiam hna lai tiah a hal tik ah, Jesuh nih a leh mi cu, voi sawmsarih letsarih nan ngaihthiam hna lai a ti. Voi sawmsarih letsarih ti mi a sullam cu a zungzal nan ngaihthiam hna lai ti duhnak a si.
• Minung pakhat nih kan cungah an sual i nem tein vun chimh i ngaihthiam timi cu, vawlei minung sining cun a fawi hrimhrim lo mi thil a si, cucaah cun bawmtu Pathian a herh. Thildik thilhman le ngaihthiamnak kan ngeih khawhnak ding caah cun Pathian sinah thazaang kan lak lo ahcun kan minung sinak nih cun a phan kho lai lo. Cucaah cun hawidawt, a tthawng mi thazaang kan ngeih khawhnak ding caah thlacam cu a herh ngaingai ko.