Bawmtu Nu Mary

     Kan Nu Mary cu a um tu a ziaza, a thinlung put, a tuah tawn kel rian le aa chuahpi mi sining ziaza in mi kha fial a hmangmi a si lo. Bawmhnak a herhmi hna kha a bawm thiammi, a theih lomi biathuk hna kha aa cinken i a ruatmi, a nun a nem ngaingai i Pathian aa bochan ngaimi khuate fa a si kha Bible thiang ningin fiang tein kan hmuh khawh(Luke 2:20).

     Kan Nu nih a chan chungah a fialmi pakhat te cu, “An chimhmi hna paoh kha tuah uh,”(Jn 2:5) tihi a si. Amah nih “keimah chimning in tuah uh” tiah zeitikhmanh ah a chim bal lo. Kannih kha “Bawipa duhning in tuah uh” ti lawng a kan cah. Cuti a si ko na buin Catholic hna cu nu a biami, Bawinu zong kha a phunphun tah chunhnak in a kan ceihphaimi zeicahdah an um rih kun? Hi bantuk ceihphainak karlak ah Catholic pakhat nih zeitin, zeibantuk, zeiphun in dah kan fianh hna lai?

     Kannih cu Bible hrambunh in, ruahnak he fonh in khua kan ruah `han a si ahcun Khrihfa timi biafang hi a keneh kawl a herh. “Khrihfa” timi cu Bawipa a zultu hna nih anmah le anmah an i auh kha silo in anmah le anmah i duh dawt ngaiin hmunkhat ah an um tti i an i bawmhchanhnak kha a hmutu Antiok khua Khrihfa asilo mi hna nih Khrihfa hna tiah an rak auh hmasa hna nak thawk in Khrihfa timi biafang a chuah kha (Lamkaltu 11:26) kan hmuh.

     Cucaah Khrihfa tiah auh mi hna cu Khamhtu Bawipa hnu zul taktak sinak in a cawnpiak ning tein le a duhning in a tuahmi hna cu an si. Asinain Khrihfa min aa bunh i Bawipa fialmi vialte a zul lomi hna, a bia zei a rello, a ngai lomi hna, i theihter, i hngalhter loin a um mi tampi an um rih hoi. Hman tein Catholic hna nih Bawinu Mary kha kan bia bak lo. Bawipa fialmi lawng kha kan zulh a si.