ZARHKEL (28) NAK ZARHPI NI

Voikhatnak Bible - Is.25:6-10a

Salm - 23:1-6 (lehnak.23:6 )

Voihnihnak Bible - Philip 4:12-14,19-20

Thawngttha Bia - Mt 22:1-14

PHUNGCHIM DING AMURU

• Tuzarh thawngttha bia kan theih ding mi hi cu rawldum ttinak puai kong deuh a si. Voikhatnak kan relmi Bible a chim duh mi cu, Vancung ram kan phanh tik i Pathian hmai ah kan i nuamhnak hnga ding kong deuh a kan theih ter. Isaiah nih a rak chim mi kha Bible cathar chung Biathlam 21:3-4 chungah kan hmuh tthan khawh. Thihnak a um ti lai lo. Ngaihchiatnak le ttahnak le fahnak zong a um ti lai lo, tiah kan hmuh, hihi kan ton te hnga ding mi a si i ruahchannak nganpi kan ngeih mi cu a si.
• Paul nih a kan chimh mi cu, Herhbau in um kha zeidah a lawh ti ka hngalh, cun a hlei a hluak ngeih zong zeidah a lawh ti ka hngalh, ka paw a ttam ah siseh ka paw a khim ah siseh tamtuk ka ngeih ah siseh tlawmtuk ka ngeih ah siseh, lungsi hnangam tein um ka thiam cang, a ti. Cu lengah Pathian cu zeizong vialte a ngei dih mi a si i nan herh mi cu an pek dih ko hna lai a kan ti rih. Chim duh mi cu, Pathian sinah hin kan zeizong vialte pe dih u si law amah hi i bochan zungzal u si, kan si ning vialte hi amah sinah ap dih u si, cu ti kan tuah khawh lawng ah Pathian fa taktak cu kan si lai i a pennak a cotu ding cu kan si lai.
• Nupi tthit rawl hrawnnak puai ah hin a hopaoh kawh kan si cio dih, kan kal lai maw kal lo, ti cu kanmah nawl cio a si. Asinain hi nupi tthit rawl hrawnnak puai ah kan kal ahcun rawl hrawnnak thilthuam kan I hruk a herh lai. Rawlhrawnnak puai cu vancung ram he tahchunh mi a si i Rawl hrawnnak thilthuam cu Khrihfa ziaza a ti duhnak a si. Cucaah cun, vancung ram kai kan duh ahcun Khrihfa ziaza ningin kan um a hau, tinak a si.
• Nawlbia pathumnak ahcun, Pathian ni kha thianter va philh hlah, a kan ti. Zarhpi ni hi Pathian ni cu a si i thianter lo in kan um sual tawn maw? Khrihfa ziaza ning in kan i chek cio ahcun zarhpi ni hi hmasabik kan thilthuam cu a si lai. A dangdang cu chim lo zarhpi ni hmanh thianter kan philh ahcun Khrihfa ziaza ning in khua a sa mi kan si lo i rawl hrawnnak thil aa hruk lo mi kan si cang, puai ah kan kal ahcun nupi tthitnak thil aa hruk lo mi kan si caah, a kut le a ke kha ttem u law khualeng mui lak ah hei hlonh u cuka ahcun va ttap sehlaw a hacang va rial seh,(Mt.22:13) an kan ti ko lai .
• Zeicahtiah sawm mi cu an tam nain thim mi cu an tlawm (Mt.22:14 ). Vawlei cung mi vialte hi sawmmi cu kan si dih ko. Pathian nih cun minung vialte hi a pennak phakpi ding in a kan sawm cio dih. Hi sawmmi vialte chungah hin kan zapi cun kan i tel kho dih lai lo va si kaw, nang le kei tah thim mi chungah hin aa tel kho mi kan si phum hnga maw?