Ngaihthiam khawh a si lo mi sualnak

Photo Credit

Friday, October 16, 2020

Luke 12:8-12 chung kan zoh a si ah cun kan Bawipa Jesuh Khrih nih Thiang Thlarau Pathian zeitluk in dah minung nunnak ah hin a bia pit ti mi hi a zultu hna sin ah a cawnpiak hna nak kong a si. Lk 12:10: “Mi Fapa a thangchiattu cu ahohmanh ngaihthiam an si lai, sihmanhsehlaw Thiang Thlarau a thangchiattu cu ngaihthiam an si lai lo” ti in fiang tein kan hmuh.
Thangchiat kan ti tikah mi nehsawh, congawih, mawhchiat, an tthat lo nak midang sin ah va chim, an zang der nak mi nih hmu hna sehlaw nehsawh hna seh, tbk,… in tampi a um.
Sihmanhsehlaw, Thiang Thlarau a thangchiat mi cu ngaihthiam an si lai lo tiah kan Bawipa nih a kan cawnpiak tikah hin zeidah a chim duh kun mi a si hnga? Kan Bawipa nih kan caah sual ngaihthiam kan si nak hnga ding caah Pa Pathian sinah a kan nawl piak zungzal tiin Hebrew cattail tu pa nih a ti;: “Cucaah cun amah thawngin Pathian a fuhmi hna paoh cu a khamh khawh zungzal ko hna; zeicahtiah zungzal in a nun caah Pathian kha a nawlpiak khawh zungzal hna” tiin kan hmuh (Heb 7:25). Cun “Profet vialte nih amah kong cu an rak chim i amah a zummi paoh cu a min tthawnnak thawngin an sualnak kha ngaihthiam an si lai” ti zong in kan hmuh khawh (Act 10:43).
Ngaihthaim khawh lo mi sual nak kan ti tikah “Sualnak a si, tuah lo ding a si, a ttha lo mi a si, Pathian duh lo mi a si, ti theih ko bu in tuah chih, pah chih” khi a si ko. Zeicah kan ti a si ah cun thieh ko buin sual nak tuah chih cu sualnak a do tu kha a ttihzah lo a si pin ah a nehsawh zong a si i zei a rel lo zong a si caah a si.
Thawngttha bia chung kan zoh tthan hna a si ah cun kan Bawipa Jesuh Khrih nih Vancung pennak kong a phuan ah siseh, mizaw a damter hna ah siseh, thlarau ttha lo a tthawl tik ah siseh, zeibantuk tthatnak a tuah zongah sual pawt ding in a bia a ngaitu, Bawipa a thih nak hnga ding caah khua a khang zungzal tu farasi mi hna zei bantuk tahchunhnak in dah bia a chim tawn timi zong tampi kan hmuh khawh.
Sualnak a rak tuah tu, mi sual pa zong kha kan Bawipa Jesuh Khrih nih a hmanung bik vailam cung aa thlai lio ah a ngaihthiam khawh ko i cu a ngaihthiam nak cu minung a kan dawt nak le tlanh a kan duh nak a langhter nak a si. Pathian cu dawtnak a si (1 Jn 4:8).
Nifatin kan nunnak ah tthatnak tuah duh lo, mi bawmhchan duh lo, pumh duhlo, thlacam duh lo in kan um i mah duh nak lawng kan tuah, mah hnangamnak le zalonnak lawng kan kawl a si ah cun sual chungah kan thla cang. Zeicah kan ti a si ah cun tuah ding a si mi theih ko buin tuah duh lo, hramhram in hrial le i phet tak a si caah a si.
Ka sual cang ka palh cang ti theih ko buin sual ngaihchih duh lo in kan um a si ah cun Bawipa nih a kan cawnpiak mi Thiang Thlarau ngaih kan chiatter, thangchiat a si caah ttih a nung tuk mi a si pin ah kan nun man a um sual lai lo.
Bawipa cawnpiak mi nun zia le a kan hmuh sak mi nun zia in nifatin a nung kho mi si khawh i zuam zungzal hna u sih. Toidornak lungthin he Pa Pathian sin ah kan sual nak ngaihthiam hal zungzal hna u sih.