Fimnak

Luke 12:39-48

• A ho kha dah zumhtlak tein le fimthiam tein a bawipa a rat lai nak ni caan kha a hngak i a um peng mi cu a si. Bawipa Jesuh cawnpiak mi hi tahchunhnak bianabia cungah hin nun cio ding in a kan sawm duh mi a si. Cu bantuk zumhtak si ning in a um mi sinum cu a bawipa nih a ngeih mi chawva thilri vialte zohkhenh ding tiang in nawl a pek kha nihin thawngttha bia chungah kan hmuh.
• A ho khi dah hawi dang sinum vialte zohkhenh ding in a thim mi cu a si hnga? Nihin thawngttha bia kan zoh tthan tikah “sal” ti lo in “sinum” tiah a si ti hi zeiruangah dah a si hnga?
• “Nannih cu nga cung le va cung le ramlak saram a hme he a ngan he an dihlak cung i nawlngeihnak kan pek hna,” a ti (Gen 1:28) tiin kan hmuh. Bawipa Pathian nih nawl ngeih nak a kan pek mi hi kan mah duh paoh in nun ding le nuamh ding in a si lo. Cu nawl ngeihnak a kan pek mi cu “zohkhenhtu siding" kha a kan fial mi a si.
• An kong lam kan theih setsai lo mi hna zohkhenh ding hi a har ngai mi a si tawn. A nuam  mi zong a si lo. Kan mah lei in thazang chuah in tuah ding thil tampi rian kan ngei. Rian khinh kan si. zohkhenh duh lo in tuk velh, hrem le thah tiang in kan tuah sahsawh ko hna ah cun, rian a kan fialtu bawipa ruah lo piin kan sin a rat tik ah ngaihchia kan si sual lai.
• Bawipa Pathian kan sin a um i kan caah ruahchan nak ngeig dingina kan chimh mi cu “lunglawmhnak thawngttha” hi a si. Bawipa nih zohkhenh ding in a kan chiah piak mi hna cungah ttha tein kan zohkhenh hna, kan um pi hna, kan hruai hna, kan kilven hna a si ah cun Bawipa Pathian “lunglawmhnak thawngttha” cu kan mah caah fehter a si hrim hrim ko lai.
• Bawipa nih zohkhenh dingah a kan chiah piak mi hna cungah fel te in le i hlau tein a daw i a zohkhenh tu si ding le si lo ding cu zalong tein thim khawh nak nawl a kan pek ko.
• Dawtmi u le nau hna, Bawipa Pathian sin ah Solomon Siangpahrang thlacam in a hal mi “Cucaah na mi hi uk khawhnak caah a ṭha le a chia kha ka thleidan khawh nakhnga, na salpa hi hngalhthiamnak lungthin ka pe tuah; zeicahtiah, aho nih dah hi na miphun ngan hi a uk khawh hna lai?”(1 Siangpahrang3:9) tiah a ti bantuk khan “fimnak” thluachuah hal zungzal hna u sih. Kan zohkenh mi Pathian sermi thil hna cungah fimthiami tein kan zohkhenh lio ah Bawipa nih a kan hmuh ah cun “Mi lunglawm mi le mi thluachuak mi” kan si ko hna lai.