Mah hngallo Khrihfa

     Khrihfa tampi cu kan sining taktak aa hngal lo mi kan sit i in ka hmuh. Zeicah kan ti ah cun, kan Khrihfa Bu ah hin, kan i bunh dih cio i, hawi dang Bu pawl kha cu vancung ram phan lai lo dingin kan hmuh cio hna. Cheukhat nih cun mah hna bu khi cu zaangfak an va si dah! “Halelluia” ti hmanh an thiam lo, an hmang lo, ti a si.

a cheu nih mah hna Bu khi cu “Halelluia” le “Praise the Lord” lawng an i hrih chih, khamhnak kong, tlanhnak kong le Khrihfa ziaza kong zeihmanh an hngal lo; zaangfak an va si ve dah, an ti. Mah ka zawn ah cun zaangfah cu kan hngal ngai nain a dang ahcun ahohmanh i zaangfah ti a um lem theng lo. Khrihfa Bu, kanmah le kanmah kan i soinak nih hin zeidah a chuahpi lai? Kei ka hmuh ning ahcun, i siiknak lawng a chuahpi ti hi a si. Kan Laitlang ah hin soiselnak aa huah bik mi Khrihfa Bu hi zei Bu dah a si hnga?

     1974 kum, Gangaw peng Mauk khua i sianginn ka kai lio ah ka hmuhton mi cu, Vui-cawngpa nih a Vui kha aa cit i khua chungah a luhpi. Vui kha khuachung a luh tikah Uico pawl nih heh tiah an boh, an dawi. Sihmahsehlaw, Vuipi cu zei poi loin amah kal ning tein a kal thluahmah ko. A zoh zong a zoh hna lo. A leh zong a let hna lo. Cu tikah Uico pawl cu pe 50 pe 100 tluk hrawnghrang an dawi khin an kir than lengmang. A caan ah cun an kir pah khan anmah le anmah tu kha an i seh theu tawn.

     A dang inn zuat satil a si mi Caw, Naa, Rang tibantuk cu Uico nih an boh an dawi hna tikah tlik pah, leek pah in an suk an perh pah tawn hna. Sihmahsehlaw Vuipi tu cu a let bak hna lo i, a tli a le fawn lo. Uico nih an ka boh ti hmanh aa hngal rua lo ti awk in a um. Vuipi cu amah sining aa hngalh caah a si. Uico boh men in ka tlik ka leek ahcun Vuipia ka si hnga lo ti aa hngalh.

     Hawidawt, nang le kei tah boh hmang khrihfa maw kan si? Boh tikah a tli a le mi Khrihfa dah kan si? Asiloah, boh tikah a zeihmanh a poi lo mi Vuipi bantuk Khrihfa dah kan si?