Pathian khua khaannak

      Bible ca chungah Pathian nih a langhter mi hna hi a thuk tuk hringhran. Mah a thuk mi chung ah hin biapi ngaimi thil Pathum an um.

      (1) Pathian khuakhannak

      (2) Khrih nih a kan tlanhnak

      (3) Thiang Thlarau nih nunnak peknak hna an si

      Pathian khuakhannak kha Khrih nih muithlam a langhter i, Thiang thlarau nih Pathian khuakhannak vialte kha a nunter i a tuan chuah.

Pathian Duhning

      Eph. 1 : 9 chungah "Pathian nih a fimnak le a thil tuah khawhnak in a rak i timh mi cu a hun tuah i Khrih thawngin a tlinter. a timh mi a khuakhannak a rak i thup mi kha kannih cu a kan hngalh ter cang" tiah kan hmuh. Pathian dawtnak ti mi cu Pathian nih a lungthin chungin a rak kan duhpiak mi kha a si ko. Cu lawng si lo in Eph. 1 : 4 ah "Vawlei a ser hlan in Pathian nih kannih cu Khrih chungi a mah taa si ding a kan thim cang. Cu caah a hmai ah a thiang soi awk um lo mi kan si awk a si" tiah kan hmuh. Pathian duhnak cu "Fa" si awk kha a si. Kan nih vialte cu Khrih Jesuh thawngin hlan lio pi ah khan Fa si ding kha kan rak si.

      Pathian nih vawlei a ser hlante khan fa si ding kha a thinlung chungah a rak um ciami a si cang. A zungzal te in khamh ding si lo in a fa hrimhrim si ding kha a rak si. Adam le Eve sualnak ruangah khan khamhnak cu a chuak mi a si.

      Jn. 1 : 18, 3 : 16 ahcun Pathian a ngeih chun Fapa tiah aa `ial. Rom. 8:29 ahcun Pathian nih a thimmi hna lakah a Fapa bantuk kha an sinak lai a dang te in a thleidan hna cucu unau rual tampi lak ah a fapa cu an upabik a sinak hnga caah a si. Fater timi cu amah hnu ah fa tampi an um rih tinak a si. Pathian cu Fapa pakhat thawngin a lung aa lawm. Nang cu ka dawtmi ka Fa na si a ti(Mk. 1:11). Pathian nih fa tampi a ngeih ahcun a lian ngannak a lang chin lengmang. Cu caah cun Pathian nih fa tampi ngeih zungzal in zungzal tiang a lianngannak langhter awk ah a duh mi a si.

Pathian Siimanking

      Simanking timi biafang hi Karik holh in a ra mi a si i (Oikonomia) timi biafang in a ra mi a si. Oikos cu inn ti a si i nomos cu (Oya') zulh phung he aa fonh i a chuak mi biafang a si. Inn chungkhar pakhat i zulh ding phung (or) Simanking tiah a sullam a chuak.

      Gen. 41:33-57 kan zoh ahcun Josef cu Faro siangpahrang inn ah tawlrel, uktu bawingan pakhat a si. Josef a tuah `uanmi cu Faro siangpahrang a ngeihmi rawl vialte kha ei awk ngei lo mang`aam tlunnak khuaram ah va pek kha a si. Eph chung zongah Paul nih cun Pathian nih a thuhmi thil langhter dingah a ka fial a ti. Eph. 3:8 chung ahcun Paul nih a chim `han mi cu, Khrih a rumnak a dong kho lo mi thawng`ha cu Jential mi hna sinah chim awk ah a ka fial a ti. Hi vialte rumnak hi Pathian inn cu a si. Mah Pathian inn ah a um mi rumnak a dong kho lo mi kha Pathian nih a thimmi hna sinah cheuh cio dingah zultu hna kha a thim hna. Cucaah cun Pathian innpi simanking chungah thim a si mi hna lakah Jesuh hrimhhrim kha a pe tu a si.