Pathian nih serhram thok nak in a innpi simanking a thoknak

      Pathian nih zeihmanh ser hram a thok hlaan ah kanmah vialte hi a kan thim cang. Eph. 1:4 chungah cun "Vawlei a ser hlan in Pathian nih kannih cu Khrih chung i amah ta si ding in a kan thim cang. Cucaah a hmai ah a thiangmi le soi awk um lo mi kan si awk a si". Mah bible cacaang ning in cun hlan liopi in kannih cu Jesuh ah kan rak um cia cang. Jesuh ah siseh, Pathian thinlung chungah a rak um cia mi kannih vialte kan chungah Pathian nih cun a fapa hrimhrim a kan chiahpiaknak thawngin "Fa" sinak hmuh awkah Pathian innpi sihmanking cu a rak thok cang.

      Sermi thil vialte cu Pathian nih "Siseh" a ti mi bia in an cang dih. Sinain minung cu "Siseh" timi bia in a kan ser lo. Pathian thinlung chungah a um cia mi kannih vialte hi cu Leidip in a kan ser. Minung a kan sernak he pehtlai in a biapi mi thil Pathum an um.

      (1) Thumkomh Pathian bia an i ruahnak

      (2) Pathian muisam kengin minung a sernak

      (3) Minung thlarau hna an si.

(1) Thumkomh Pathian Pakhat biaruahnak

      Gen. 1:26 ah "Atu cu minung kan ser cang hna lai kanmah mui an keng lai i kanmah he kan i lo lai". Hebrew holh in Pathian timi bia fang hi pakhat ca lawng a si lo a tamdeuh caah hman mi a si. "Kanmah ... kan tuah lai" ti bantuk hman a si. Hihi Pathum komh Pathian pakhat timi a sawh. Pathian nih minung ser hna u si a ti tik ah bia aa ruahmi an si nak kong hmuh khawh a si. A dang thil sernak kong ah bia an i ruahnak kong hmuh a si lo. Ser u si ti lo in siseh ti lawng kan hmuh. Cu caah cun minung ser tikah a biapi tuk ti hi a lang. Van le vawlei a serminak in minung ser kha a biapi deuh. Pathian nih minung kha a biapi tuk in a chiah tinak a si.

(2) Pathian mui he lo in sernak

      Kanmah he aa lo in minung ser hna u si (Gen. 1:26). Pathian nih minung a ser tikah minung nih Pumsa, Lungthin, Thlarau tiah a ngeih (1Thes. 5:23). Thlarau le lungthin cu a chunglei he pehtlai mi a si i Pumsa cu lenglei he a pehtlai. 2Kor. 3:18 ah cun kannih vialte he Jesuh bantuk in thlen kan si lainak kong a chim. Rom. 12:2 chungah chunglei i thlennak in sining vialte i thlennak kong zong kan hmuh.

      Thumkomh Pathian bia ruahnak cu Pathian timhmi ah minung kan sinak kong a lang i amah he aa lo in a kan sernak cu a lianngannak langhter ding ah a si.

(3) Minung thlarau

      Pathian nih minung zeitin dah a sernak kong Gen. 2:7 chung ah kan hmuh. Leidip kha a laak i minung pungsaan ah a tuah i a hnar in nunnak thaw a rawnh tikah minung ah aa cang. Ahnar in nunnak thaw a rawnhmi kha minung thlarau cu a si. Leidip cu pumsa a si i nunnak thaw cu thlarau a si. Pathian nih minung leenglei a si mi pumsa he aa pehtlaimi ti rawl kha hman dingah a tuah bantuk in a chunglei he a pehtlaimi thlarau zong nih Pathian he pehtlai ding in a ser ve. Rom. 9:23 ah Pathian nih minung cu a veel cohlang dingah a kan sernak kong a chim. Hrai nih cun ti kha cohlan ding a si bantuk in minung nih Pathian kha cohlan ding a si.

            Pathian nih minung cu amah he lo in a sernak cu minung chungah Pathian luh in Pathian he pumkhat si ding ah  a si. Minung nih Pathian he pumkhat a si tikah Pathian kha "Ka Pa" tiah a auh khawh i "Fa" sinak zong kha a hmuh chih.