Mithiang Pawl Puai

Voikhatnak Bible  -  Biathlam 7:2-4,7-14

Psalm                  - 24:1-6 (Lehnak 24:6)

Voihnihnak Bible   - 1John3:1-3

Thawngtha Bia      - Matt 5:1-12

• AD 300 hrawngrhang thok in khrihfa hremnak hi a chuak ti a si. mah lio caan hrawng ahcun zumhnak ruangah thah bak a si ko. An zumhnak a thawn ning hi hmurka le tuahsernak lawng hmanh si loin an nunnak hrimhrim pek in tette ana khaan. Zumhnak rungah thah a si mi hna kha Martyrs ti an si. mah biafang hi Greek holh a si i a sullam cu tette tinak a si.
• Zumhnak ruangah thahnak aa huahmi hna kha khrihfa vialte nih upat le thangthat an si. A ruang cu an nih cu vanram ah Pa Pathian he hmuhkhat ah an um ti cang tiah an zumh ruangah a si. cucahcun vawlei cung khrihfa vialte nih mithiang hna tiah auh an si.
• AD 600 hrawng a phanh tikah cun Rone siangpahrang uknak tang in khuachia biaknak vialte kha Pathian biaknak lei ah an i mer dih cang. AD 609 kum a phanh tikah cun Pope Boniface IV nih Bupi cu a hruai. Hlanlio khuachia an biak lio i milem phunphun an ser an biak mi vialte kha hrawh dih a si i Nu Mary milem le mithiang hna milem tampi ser in khuazakip ah taar in upatnak pek a si cang. rome khua na phanh ahcun a tutiang hmanh ah a um rih ko.
• Minung nih cun mithiang pawl hi kan thei dih hna lo, asinain Pathian nih cun a hngalh dih hna, an nih riang cu kanmah vialte Pathian sin phanh khawhnak ding caah nawl piaknak hal piak kha a si. AD 800 hrawng thawk in mithiang vialte puai hi November (1) ah tuah a si cang.
• Khrihfa kan si hnawhchannak a bik cu mithiang si ding hi a si. Mithiang siding ah zeidah kan tuah lai. Mithaing siding ah tiah Pathain nih a khaukhih cia mi an um lo, ti hi kan hngalh cikcek awk a si. Na duh ahcun mithiang na si kho i na duh lo ahcun na si lai lo, a poi ngaimi le a har ngaimi cu, mithiang si nih duh tung, ngamh lo, zuam lo, mah ning kel in um peng ko ah khan cun mithiang cu kan si kho ruam lai lo.
• Ka dawt mi ka fa le hna, a tu hin kannih cu Pathian fa kan si cang, a sinain zei kan lawh lai cu a fiang rih lo. Sihmanhsehlaw Khrih a langh tikah amah Khrih bantuk kan si lai ti cu kan hngalh, zeicah tiah a sining taktak tein kan hmun lai. Khrih zohchunh in, cu ruahchannak a ngei mi poh cu, Khrih kha a thianhlim bantuk in thianghlim tein a um ve, sual a tuah mi poh nih Pathian nawl a buar a si, zeicah tiah sual cu nawlbuar a si (1 John 3:2-4).
• Vanram lei kan khual tlawnnak ah hin mithiang siding hi kan tuan, kan tuah, kan i zuam cuahmah liopi a si ve ko, a ruang cu, kan unau pawl tampi cu vanram ah an um dih cang i mithiang tiah auh an si cang. Nang le kei zong anmah pawl zohchunh in ruahchannak nganpi le hninh khawh lo mi zumhnak he ral tha ngai in hmailei ah kaar hlang chin ve ko u si.