Rawl Danghnak

• Thlarau hna caah thlacam nak kan tuah ni Missa thawinak kan tuah lio caan kan rel mi Isaiah cathiang chungah kan hmuh mi cu: “Hi Zion Thlang cungah hin Ralkapbu Pathian nih vawlei cung miphun vialte caah rawl danghnak a timh lai-cu rawl danghnak cu rawl thaw bik le zu thaw bik in a timh lai” tiin kan hmuh (Is 25:6). Van cung ram kong he pehtlai in Bawipa nih a kan cawnpiak tikah hin rawl dannghnak he a tahchunh tawn kan hmuh; cu rawl danghnak hmah cu nupi thit rawl danghnak he a bik in a tah chunh tawn.

• Nupi thit rawl danghnak hmun ah cun lunglawmhnak a um, minung tampi hmunkhat tein um ti nak hmun zong a si; zeicah kan ti a si ah cun puai tuah nak hmun a si caah a si. Kan Bible cathiang chungah Pathian cu mopa sining le a Bupi cu monu sining in a langhter tawn. Mithiang Johan nih: “Tuufa nupi thitnak puai i sawmmi hna cu milunglawm an vas i dah!” tiin kan hmuh fawn (Bia 19:9).

• Nihin thawngttha kan theih mi chung zongah rawl danghnak kong he pehtlai in a si (Lk 14:15-24). Kan nih pakhat cio hna zong Bawipa nih a thi le sa (missa raithawi nak) in rawl danghnak nifatin a tuah nak ah a kan kawh ve cio hna.

• Cu rawl danghnak (Biakinn) ah a kal kho mi kan si ve hna maw? Si lo ah mah duhnak lei lawng a kal mi maw kan si? Bawipa nih a kawh mi hna an rat lo a theih tikah a sal pawl kha an hmuh mi hna poh auh ding le a rawl dumnak khaan khah ter ding ah a fial hna khah.

• Kan kal sual lo a si ah cun Pathian kan caah a ngaih a chia lai lo kha mu, kan mah tu ngaih chia kan si lai. Zeicah tiah Pathian cu zeizong vialte in a thling mi a si.

• A kan kawh lio ah Pathian nawl ngaih in Amah sinah panh khawh i zuam cio hna u sih.