Thlarau Thazaang

November 19, 2020

“Ngeihmi Caanṭha le Thilṭha Hngalhnak”

Amah khamh awkah a ra mi Bawipa kha Jerusalem nih a hngalh lo caah Bawipa Jesuh cu a ṭap...

Khrih ah dawtmi nu le pa, u le nau hna, nan dam cio maw? Bawipa i pek mi hnangam daihnak cu nanmah he um zungzal ko seh. Bawipa nih a kan pek mi caanṭha le thilṭha hna hngalh hi khamhnak hmuh awk ah abia pi ngai mi a si i kan hngalh lo sual a si ah cun a poi tak mi tlaunak, sunghnak nganpi a si fawn. Nihin November 19, 2020 ni i kan rel hnga mi Thawngṭhabia Luka 19: 41-44 chungah Jerusalem nih caanṭha a ngeihmi le a man a sung tuk mi a ngeihmi kha a hngalh lo caah Bawipa Jesuh a ṭapnak kong kha kan hmu kho.

                        Kannih minung hna hi caan tampi ah kan ngeihmi caanṭha siseh, kan ngeih mi a sung ngai mi thil hna siseh kan hngalh lo i zei hmanh rel lo in kan um caan a um tawn. Nihin kan rel mi Gospel chungah zeiruangah dah Jesuh a ṭap? Kan Bible chungah Bawipa Jesuh a ṭap nak vei hnih kan hmu kho i nihin kan rel mi le a dang pakhat cu Jn 1:35 ah a dawt ngaimi Lazaruh a thihnak ruang i a ṭapnak kha a si. Nihnin kan rel mi ah Jesuh nih Jerusalem a ṭah nak cu zeiruangah ti a siah cun an ngeih mi caanṭha an hngalh lo, kum tampi chung an hngah leng mang mi khamhtu pa an sin ah a phan taktak tikah an hngal lo i zei hmanh ah an rel lo caah Bawipa Jesuh a lung a fak i a ṭap. A man a sung tuk mi an sin ah a um, a man a sung tuk mi an ngei na bu in an hngalh lo. Kawl holh in “ma-shih-da-ṭhet, ma-tih-da-khet” an ti tawn. Ngei lo nak in hngalh lo hi a har deuh ti a si. Bawipa Jesuh an sin ah phan hlah selaw, an sin ah um hlah selaw a ning deuh men lai. A tu cu an sin ah a um na bu in an hngalh lo i zei hmanh an rel lo caah a poi taktak mi a si.

                        Dawt mi u le nau hna, kan nih teh kan sin ah a um, kan ngeih mi a sung tak mi caanṭha le thilṭha hna a hngal lo in kan um sual ve hnga maw? Nihin ah a thar in ruat ṭhan u si. Minung cheu khat cu an nu le pa an nung lio ah zei hmanh rel huha lo in an thih hnu ah a poi tuk e tiah ngeih chih in a um mi zong tam pi an um tawn. Kan ngan dam lio ah, kan duh poh in kan ṭhut dir khawh lio ah, ngandamnak i a sunnak, man a ngeih nak kha hngalh lo in Pathian sin ah lunlawmhbia chim thiam loin a um mi kan si sual hnga maw? Kan ngeih mi hna hi a man a sungnak kan theih a haunak kong he pehtlaih in tahchunnak ah ka chim tawn mi cu zei dah a si tiah cun: hlan lio pi in kan laitlang ah zawngṭah hi a um cang mi a si ko. A hlan ah cun kan ei khawh tawk in kan ei i kan ei kho ti lo mi hna cu mah tin kan chiah sawh, kan hlawnh, kan hngakchi lio ah cun lente celh nak zong ah kan hmang tawn. Na tein a tu chan ah cun zawngṭha kung khat ah sing zetzat ti a si cang i a ei hmanh kan ei siang ti lo, a mah fak ngai in kan zuar cang. Hlan lio i zawngṭah le a tu chan i zawngṭah hna hi an i lo ko. A lo lo mi cu kan hngalh nak kha a lo ti lo. A tu zong ah kan laitlang ah siseh, vawlei cungah siseh kan hngalh rih lo mi a sung tuk mi thil tampi a um rih ko lai.

                        Biaknak lei i kan zumhnak zongah mahbantuk tampi a um ve. Bawipa nih a kan pek mi thluachuah vialte, a bik in kan Catholic bupi chung i kan ngeih mi, a man a sung tuk mi thil tampi hna kha hngah huha lo in zei hmanh rel huha lo in kan um caan tam pi a um ṭheu lai tiah ka ruah. Kan ngeih mi tampi lak chung in tlawm pal hei chim ning law, tahchunnak ah a tu nai te i talngval mithiang thar te kan ti lai i a fawiank ah, Blessed Carlo i a chim mi cu ‘Bawipa Thisa hi Vancung kal nak caah a rang cem in kal khawh nak highway asi a ti. Cun a mah hi Rosary he thlacam zong a duh taktak mi zong a si fawn. A mah caah cun hi Missa raithawinak i pumhnak le Rosary he thlacam tiban tuk hi zei in hman thlen khawh lo mi a man a sung tuk mi hna an si. Mah tluk in a man a sung mi, kan ngeih mi hna hi kan nih tah kan hmu kho ve maw? A silo ah Jerusalem i a um mi hna ban tuk in a hngalh lo i Bawipa a ṭap ter tu kan si ve hnga maw?

                        Dawtmi nu le pa, u le nau hna, Bawipa nih a kan pek mi thluachuah, caanṭha siseh, vawlei cung thil le ri le ngandamnak zong siseh, thlarau lei caah kan herh mi a kan pek mi vialte zong siseh ṭha te in a hngalh ko i a hman zong a thiam tu kan si nak hnga zuam hna u si. Pathian nih pakhat cio i kan hreh mi thluachuan vialte a kan pe cio ko seh.  

Fr. Peter Lal Zin Thang (Hakha Diocese)

Kan rel hngami Gospel cu: -  

Luka 19: 41-44

⁴¹ Jerusalem khuapi cu a hei naih chin lengmang i a hei hmuh tikah a ṭah i, ⁴² “Nihin ah hin daihnak caah zeidah a herh ti kha hei hngal law cu mu! Sihmanhsehlaw cucu nah mu kho ṭung lo. ⁴³ Zeicatiah na ral nih raltuknak chuntlung in an in kulh i an in hren i a kendip in an in luhhnawh caan kha a phan lai. ⁴⁴ Nangmah le na vamping kulh chung i a ummi minung hna cu an in hrawh dih cikcek hna lai: Pathian cu nangmah khamh awkah a rat caan kha na hngalh lo caah cuka hmunah cun aa chonhmi lung pakhat hmanh leh loin an kaltakmi a um lai lo.”

(Bawipa Thawngṭhabia a si.)