Thlarau Thazaang

November 28, 2020

“Ralring Tein Thlacam Zungzal”

Ralring tein um u law thla va cam zungzal ko u...

Khrih ah dawtmi nu le pa, u le nau hna, Bawipa i pek mi hnangam daihnak cu nanmah he um zungzal ko seh. Nihin November 28, 2020 (Zarhte ni) hi kanmah biaknak lei ‘Liturgical year’ in kan zoh a si ah cun dum donghnak ni a si. Cuasicaah Pathian nih a kan pe cangmi thluachuah vialte caah, a bik in kan zumhnak, kan thlarau caah a kan pek mi thluachuah caah ah Pathian sin ah lunglawmh bia chim hna u si law, thaizing in kum thar kan thok ṭhan lai, Advent caan chung kan lut cang lai i hmai lei kan khual tlawnnak ding ca zong ah kan herh mi thluachuah hna kha lunglawmhbia chim bu in hal hna u si ti kha a hma sa ah sawm kan duh hna.

Nihin kan rel hngami Gospel he thazaang la cio hna u sih.  

Luka 21: 34 -36

³⁴ “I ralring tuah u. Zudin sa-einak le khuasak tintuk harnak lawng kha ruat hlah u, cu ti nan si ahcun cu Ni nih cun ruah lopi ah rap bantukin an foih sual hna lai. ³⁵Zeicahtiah cu Ni cu vawlei cung i a ummi vialte hna cungah a tlung dingmi a si. ³⁶Hi a tlung hnga dingmi thil vialte hi him tein chuak lakin nan tan khawh nakhnga, thazang nan ngeih nakhnga le Mi Fapa hmaiah nan dir khawh nakhnga, ralring tein um u law thla va cam zungzal ko u,” tiah a ti.

(Bawipa Thawngṭhabia a si.)

            Kum donghnak lei kan phan in kan rel mi Bible hna kan zoh tikah caan donghnak kong asiloah Bawipa a rat ṭhannak ding kong lawng te kha kan rel tawn ban tukin, nihin zongah Bawipa a rat ṭhannak ding a ni kha kan hngalh kho lo caah ralring tein um u tiah Bawipa nih ralrinnak a kan pek ṭhannak kong kha kan hmu. A hmaisa bikah “I ralring tuah u. Zudin sa-einak le khuasak tintuk harnak lawng kha ruat hlah u” tiah Bawipa nih a ti. Bawipa nih ralring tein um awkah a kan chim tikah ‘ei-din in siseh, vawlei cung thil le ri cungah lungthin chiah in siseh, lung rethei in siseh kan um sual nak hnga lo a chim tawn mi kha kan hmu kho. Luka 17:26-27 ah “Noah chan ah a rak si bantuk khan Mi Fapa chan zongah a si ve lai. Noah nih lawng chungah a luh i buanchukcho kha a tlun i an thih dih ni tiang hrimhrim kha, an ei an ding, an i ṭhi an i um ko,” ati. Cun kan rel bet a si ah cun Lot chan lio i a cang mi kong zong kan hmu kho, an thi dih hlan tiang an ei, an ding i nuam in an um ti a si. Cun mah kong ṭhiamṭhiam kha Mt 24 chungah zong kan hmu kho i St. Paul cakuat hna zongah ei le ding i nuam ngai te in kan um sawhsawh lo nak hna ralrinnak a kan pe mi hna kha kan hmu kho.

            A tlangpi in kan zoh a si ah cun, Pathian duhnak he a kalhmi nuamnak vialte, ṭhat lonak vialte ah khan nuam in kan um lo nak hnga a kan chim duhmi a si. Ṭhat lo nak tampi lak chungin Bible nih ralrinnak a kan pek  tikah ei le din kong hi a tel kho peng. Ei le din a ti tikah, ti sawhsawh le a cho-yi hna kha a chim mi a si lo ti cu kan thei dih mi a si ko lai. Nihin Gospel ah cun “I ralring tuah u. Zudin sa-einak le khuasak tintuk harnak lawng kha ruat hlah u,” tiah fiang tein a kan chim. Zudin ban tuk le zudin nak in a ṭha lo deuhmi zong tampi a um ko nain Bible nih zeiruangah zundin kong bik hi a chim tawn a si hnga ti ka tuak tikah: - zeibantuk in cathiam mifim le bawi kan si zongah zu kan ri tikah cun mi hrut bantuk ah kan cang dih. Kan lung a molh, kan ruahnak a hmaan tilo i chim lo dingmi bia zong kan chim, a ṭha lo mi tuah kan ngamh lo mi zong kan tuah ngamh ṭhan, cun zu kan ri tikah zeizong vialte ah ralring in kan um kho ti lo. Bawipa nih harnak, chiatnak a phunphun a tlung lai i “hi a tlung hnga dingmi thil vialte hi him tein chuak lakin nan tan khawh nakhnga, thazang nan ngeih nakhnga le Mi Fapa hmaiah nan dir khawh nakhnga, ralring tein um u law thla va cam zungzal ko u” a ti. Zu kan ri a si ah cun kan ralring kho lo i thla va cam zungzal ko u a ti mi zong thla kan cam kho ti lo. Hmasa i ka chim ban tukin, zu bantuk le zu nak i ṭha lo mi a dang tampi zong a um ko nain nihin Bible ah kan hmu mi a si caah zu kong kha a bik in a chim nak a si.

Bawipa nih thla va cam zungzal ko u a ti tikah zeitin dah zungzal in cu thla kan cam kho lai ti zong kan ruat kho men. Thlacam kan ti mi hi Bupi cawnbiaknak ah kan zoh a si ah cun ‘kan lungthin kha Pathian siah kan cawinak asiloah kan lungthin kha Pathian sinah kan chiahnak ti zongin kan ti kho lai,’ mah kha thlacamnak a si. Cuasicaah Bawipa Jesuh cu a lungthin kha a Pa Pathian sinah a phan peng, a um peng caah zungzal in thla a cam peng tu a si i kan mah zong a mah ban tuk in thla a cam zungzal kho mi kan si ding kha a duh mi a si. Kan lungthin sungah Bawipa a um peng i kan cawl cang nak ah Bawipa duhnak ban tuk in kan um a si ah cun zungzal in thal a cam tu hna kan si lai. Dawt mi nu le pa, u le nau hna, vawlei cungah hin Satan hnahnoh nak a phunphun in a um i a tam tuk caah ralring te in um u si law zungzal thlacamnak he theinak a hmu kho peng tu kan si nak lai Pathian sinah thluachuah thazaang hal in zuam cio hna u si.   

Fr. Peter Lal Zin Thang (Hakha Diocese)

https://fb.watch/20BbiTeMhB/