Zarhthumnak Advent Zarhpi Ni

Photo Credit

Saturday, December 12, 2020

Zarhthumnak Advent kan phan cang. Kan lungthin chungah thanchonak zeital kan ngei cio maw? Kanmah ning kel dah kan si rih ko. Nihhin thawngtha kan theihmi chungah, Johan kha bia an hal mi ah zeitin dah a leh hna ti kan zoh ahcun, kei cu profet Isaih nih Bawipa kalnak caah lam kha ding tein rak ser u, tiah thatse ram ah a au mi aw, a ti mi kha a si, tiah a leh hna. Hi bialehnak kan zoh tikah Johan nih a si ning tein a leh hna. Ahlei hluak in , porhlawtnak le chim porhnak bia pakhat hmanh a telh lo.
A tu Khrihfa kan sining cio ah hin Bawip Khrih thawngtha a chimmi lawngte kan si dih ko va si kaw, nang le kei tah a ho dah na si tiah zum lo tu pawl nih kan hal hna seh law zeitindah kan leh cio hna hnga,…Kan leh hnga ding mi cu, keimah cu Khrihfa ka si, ka nunnak vialte ah hin zumhtlak tein Jesuh zulh ding ka si i midang vialte zong kha amah sin phanhpi ding ah lam hruai ding ka si, keimah cu amah caah thawngtha chimtu ka si, tiah kan leh ding a si.
Tipil petu Johan bantuk in kannih vialte zong temhinnak kan tuar cio a hau. Asinain ahohmanh nih kan lungthin chung nomhnak cu an kan chut kho lai lo. Cun kan nunnak Advent caan a dih tikah cun Jesuh he kan i tong lai i amah he zungzal in zungzal tiang kan um ti cang lai. Harnak le temhnak kan tuarmi vialte kha lawmhnak le nuamhnak ah an cang dih cang lai.
Thla kan cam hnga ding cu, kan zumhnak a feh chinnak ding le Jesuh nih a kan dawtnak hngalh chinchinnak ding, mit hmuh kuttongh bak in a rian thiang kan tawk zawn cio in kan tuan khawh i a sunparnak a langhter kho tu kan si cio nak hnga ding caah fakpi in thlacam I zuam cio hna u si.