Biatak a si mi Bawipa Jesuh

Micheu cu mah tein cawn duh lo, hlethlai duh lo ruangah a fawi nak in biahalnak tu in a fawinak lam an kawl tawn. Pharisees mi hna Saducees mi hna nih, thih hnu thawhthan nak an zumh mi le an zumh lo nak nih hin an karlak ah then nak hrampi a um ter nak a si. Sihmanhsehlaw Pharisees mi hna nih an duh lo  mi; Jesuh nih “Kei mah cu thawh tthannak le nunnak ka si” (Jn 11:25) a ti mi hrim nih hin a hnih tuk ve hna.

Nang teh thil hmaan le thil dik a si mi a el mi hna sin ah na nunnak chirchanh in na el ngam ve hna lai maw, na nunnak in na dir kamh pi ngam ve lai maw? Bawipa Jesuh nih a zul tu hna sin ah a chim mi cu: “Biaktak cu nan hngalh lai I biatak nih cun an luatter hna lai” tiah a ti hna (Jn 8:32). Zeicah kan ti a si ah cun Bawipa nih: “Keimah hi lam le biatak le nunnak ka si; keimah sinin ti dah lo cun ahohmanh Pa sin an phan kho lo” tiah a ti hna caah a si( Jn 14:6).

Israel mi hna cu Izip ram in biakamnak ram (Canaan) lei an kal lio caan kum 40 chung zongah an pel hna nak ram mi tampi hna i buai hnawhnak, raltuk nak le hneksak nak tampi an rak tong.  Tipil petu Johan zong nih sual ngaihchihnak le Messiah Bawipa a rak lai nak lam thluan tha tein remh dingin thawngtha a chim tik ah biaknak lei phung hruaitu hna le Palestine ram uk tu tampi nih an doh i a thah tiang in an rak thah ve khah. Kan Bawipa Jesuh Khrih hrimhrim zong biaknak lei phung hruaitu hna i dohnak le thahnak a rak tong thiamthiam ve. Zeicah tiah cun Baiknak phunglam an hmuh mi ah Pathian Bia le duhnak an hmuh khawh lo caah a si.

Messiah cu na si maw tiah bia an hal mi zong Bawipa Messiah a si nak a cohlaang kho lo mi hna an si caah, hi mi pa nih Pathian thang a chiat an ti lai i an thah colh lai. Sihmahsehlaw, Bawipa nih an lung chung in an ruah nak thil tha lo a hmuh ziar tikah bia a hal than ve mi hna cu: “Johan tipil peknak kha: Pathian sinin maw a si, minung sinin dah?”(Matt 21:24) tiah a hal ve tik hna ah chim awk an hngal lo. Zeicah kan ti a si ah cun Johan cu mithiang hlim, midik, le a hmaan mi bia a chim tu Pathian thlah mi a si kha an theh caah a si.

Hi kong kan zoh tikah “a ho hi dah biatak nawl ngeitu le a hmaan mi a si” timi an cohlaan khawh lo nak kan hmuh kawh. Dawtmi u le nau hna nang le kei tah biatak le thilhmaan a cohlaang kho cang mi le a nun pi kho cang mi kan si ve maw? Bawipa cu biatak le nunnak le Pa sin kal nak lampi a si kha fek tein zum hna u sih law, Bawipa nun zia midang hna cungah kan nunnak in langhter hna u sih.