Hringtu Pathian

“Eliazar cu Matthan pa a si; Matthan cu Jakob pa a si; Jakob cu Josef pa a si; Josef cu Mary va a si, Mary cu Messiah timi Jesuh nu kha a si” (Matt 1:15-16).

A rauhhlan ah kan tuah hnga ding mi puai hi zeitluk in dah a sunglawi i sullam a ngeih timi hi ruat cio hna u sih. Pathian hrimhrim nih minung sinak aa lak nak puai a si. Kan mah minung hna bangin paw chungah pawi a si, hrin a si kan mah minung hna  bangin a thang mi Pathian a si. Amah zong kan mah minung hna bangin huatnak, nehsawhnak, tukvelhnak le thihnak a in mi a si ve.

Jesuh cu Pathian biakamhnak a tlinnak a si. Minung a si mi paoh nih kan pi/pu hrinsor kan ngei cio hna. Hlan chan kan pi/pu hna kan zoh han tik ah miding le mi tha an um bantukin pawngkam nih an cohlaan duh tuk lo mi hna zong an um ve. Cu ve bangin kan Bawipa hrinsor ning kan zoh tik ah mithawng, mi lian ngan an um bantukin mi zangder zong an um ve. Sihmahsehlaw, Pathian nih a kan dawtnak cu minung si nak aa lak nak in a langhter.

Minung hna nih Pathian bang kan si khawh nak hnga ding caah Pathian cu minung ah a hung cang.

Taksa lei in hrinsor tu pupa hna kan i ngeih hna bangin thlarau lei in a kan hringtu kan i ngeih ve. Amah cu Pathian hrimhrim kha a si (1 Peter 1:9).

Pathian minung sinak a rak i lak lio caan ah nunnak a ngei lo mi hna hmanh nih dai zirziar in an don a si ah cun nunnak a ngei mi minung hna nih cun sal tannak in a kan luatter tu ding, kan thlarau a kan tlenh tu ding Pathian cu timhtuahnak tha he kan don ve hrimhrim ding a si.

Christmas kan phanh hlan ah zeiruangah dah Advent (timh caan) tiin Bupi a kan tuah piak ti mi hi tha tein ruat cio hna u sih. Hi timh tuah nak caan a dongh lei kan panh tikah pakhat cio nifatin kan nunnak ah zeitindah kan Bawipa Jesuh Khrih caah timh tuah nak kan ngeih cio? Christmas a hung nai chin leng mang cang. Christmas caan ah zei bantuk thil dah kaa hruk lai ti lawng in maw, khaw zei lei ah dah khual ka tlawn lai ti lawng in maw, asiloah biakinn le mah inn le lo tamhmawih nak lawng in maw,…?

Hi bantuk timhtuah nak kan ngeih lio caan ah hin pumpak, chungkhar, hawikom, pawngkam ah kan Bawipa a chuah khawhnak hnga ding caah hmun hma tha pe cio hna u sih. Kan thlarau caah a tha bik in timhtuahnak ngei cio hna u sih. Puai kan tuah lai hnga ding mi hi zeitluk in dah a sunlawih ti mi zong ruat hna u sih.