Vancung Pennak

Cu caan thawk cun Jesuh nih, “Vancung Pennak a nai cang caah, nan sualnak kha mertak cang hna u” tiah a chimh lengmang hna. (Matt 4:17)

• khan rel kan theih mi thawngtha bia ah, Jesuh cu Nazareth khua in a chuak i Galilee lei ah a va kal; cu ka hmun cun thawngtha bia a chim nak kong kan theih. Jesuh cu amah miphun hna sin um lo in hmuh ning le zumh ning aa lo lo mi hna sin ah a va kal i an sin ah a um.
• Jesuh Khrih vawlei cung a ratnak sullam cu Judah miphun hna ca lawngah si lo in miphun vialte caah a si tiah mithiang Matthew nih fiang tein a langhter. Vancung Pennak a nai cang timi kong va phuan dingah Jesuh nih a zultu hna kha vancung a kai hlan ah bia a cah ta hna. Cu a si caah kan mah pakhat cio hna zong Bawipa fial mi rian tuan ding rian kan ngei cio.
• Vancung Pennak cu kan thih hnu lawngah kan hmuh hnga ding le kan ton hnga ding mi a si lo. A tu kan pawngkam te ah hin a um ko. Pakhat cio kan palh-kan sual nak a si mi nekngeih nak, rem lo nak, zaang en nak te hna khan i remnak, daihnak le dawtnak ah thlen in Vancung Pennak kha kan umnak cio ah ser hna u sih.
• Vancung Pennak cu kan pawng te ah a um ko. Vancung Pennak bantuk siding in kan pawngkam zong ser ding rian kan ngei cio.
• Cu a si caah, dawt mi u le nau hna, pakhat cio kan lung chungah kan Pathian daihnak a um khawh cio nak hnga rem lo nak kha hlawt in dawt nak thinlung in a khat mi, ruam kai nak kha hlawt in toidor nak lungthin a ngeitu si ding in i zuam cio hna u sih. Kan chungkhar chungah siseh, kan phu chungah siseh, kan khua kan ram chungah siseh, Vancung Pennak a um khawh nak hnga thlawk cang hna u sih.
• Thla kan cam hnga ding mi cu: “Maw Bawipa, na daihnak hriamnam ka si ter hram ko sawh” ti in nihin thlacam hna u sih.