Bawmhchanhnak

Photo Credit

Monday, January 04, 2021

Nihin kan rel mi Bible cathiang cu, kan Bawipa Jesuh Khrih nih changreu hlum 5 le nga 2 nih mi 5000 rawl a dangh hna nak kong a si. Hi mi hna hi kan Bawipa Jesuh Khrih cawnpiak nak thawngtha ngaih duh le theih duh ruangah tiva kam in a hngak tu hna zong an si. Bawipa nih an si ning a hmuh tik ah a zang an fak. A cawnpiak hna. Cuhlei ah, tluang te in le rem tein a dinhter hna i an pumsa caah a herh mi thazang caah rawl zong a dangh hna. Cu hnu lawng ah tlang cungah a kai i Pa Pathian sinah thla a cam.
Kan pawngkam ah siseh, kan hmuh ton bal mi hna zong si hna seh, thinlung thazang a dermi, harsatnak a tong mi, chungkhar chung zongah har a tong mi, chawlehthalnak zongah har a tong mi si hna seh, rian tuan ding ngei lo in har a tong mi si hna seh tampi an um ko hna lai.
A caan caan ah kan sin ah rat in bawmhnak siseh, thazang bia pakhat khat siseh a rak kan chim tu le a rak kan hal tu zong an um ko hna lai. Cu tik ah Jesuh Khrih bangin zei tin dah kan bawmh khawh cio ve hna lai?
Kan Bawipa Jesuh Khrih nih taksa thla zang lawng si lo in thlarau thazang tiang in thawnnak a pek hna. Kan ngeih mi thliri chawva siseh, hnipuan siseh a herh tak tak mi hna kha kan bawm bal hna maw? Tamtuk kan ngeih ruangah siloin kan mah zong nih kan duh ve mi thil hmanh kha siang ngai in kan pe kho cio bal hna maw?
Kan Bawipa Jesuh Khrih nih cun taksa thlarau thazang rawl a dangh cang hna. Cu tic un tuah cio ding in a kan sawm cio. Kan tuah khawh tik zongah, Bawipa bangin thla kan cam piak ve hna maw? Bawipa nih cun Pa Pathian he an i chawn i thla a kan cam piak cang.
A caan caan ah ka rian a tam tuk tiin thlacam kan philh sual maw? Ruat than hna u sih. Bawipa nih thlacam a herh ning konglam a kan hmuh sak cang. Amah cu Pathian Fapa a si ko nain Pa Pathian sinah thla a cam. Kan nih pakhat cio zong kan nunnak caah siseh, pawngkam um mi vialte hna ca zongah siseh thlacam piak zungzal hna u sih. Cu cu Bawipa nih a kan duh piak mi a si.
Thla kan cam hnga ding mi cu: “Maw Bawipa, midang a hnemh kho tu le thlacam ah aa lawm zungzal kho tu ka si ter ko sawh” tiin thlacam hna u sih.