Thleidan thiam

Genesis 6:5-8;7:1-5,10

Mark 8:14-21

Jesuh nih an I ceihmi cu a hngalh I cucaah, “Zeicahdah changreu nan ngeih lonak kong cu nan I ceih len ko? Nan thei kho in nan hngal kho rih hrim lo maw? Cuticun maw nan lung a pin ko?  Mit nan ngeih ko ttung, nan hmu kho lo maw? Hna nan ngeih ko ttung, nan thei kho lo maw?” (Mark 8: 17-18)

Hi biahal nak hi Jesuh nih a zultu hna sin ah a hal mi hna bia a si. Hruaitu ttha lo hna i hman mi “thilnu” cu midang tampi a hrawk kho tu a si. An thuh mi ruahnak siseh, an ruam kai nak siseh, hmunhma pakhat khat an duh tuk hringhran caah mi tampi zumhnak an hrawh tawn. Cu a si caah Jesuh nih hi biahal nak chungin a hnu zultu a si mi hna nih thil tthalo thilnu bantuk hna kha theih thiam in hrial khawh thiam nak hnga ding caah ralrin nak a pek hna nak zong a si.

Zumh tlak a si lo mi le mi dang lung vaivunhter kho tu “thlaici-thilnu” bantuk thil te te pawngkam ah tampi an um. Tuchan thil tuahtan ning cang hna kan zoh tik zongah Vancung Pennak konglam he a ralchanh mi thil tampi an um. Zultu hna nih Pharisees mi hna le Herod bantuk ruahnak ttha lo “thilnu”a ngeimi hna an hmuh thiam hna lo ning le an theih thiam hna lo bantukin kan nih hna zong pawngkam um hlenthiam mi hna “thilnu” kan hmu thiam tawn ve lo. Cucaah tthatnak lei panh lo in that lo nak lei tu ah hnuh lengmang kan si tawn.

Kan theih hnga ding mi cu, nawl ngeitu poh hi zumh awk tlak tak a si mi le hruaitu ttha tak an rak si dih tawn lo. Midang cungah biakhiah nak nawl le biaceihnak nawl cu kan ngei hrimhrim lo. Pathian pakhat lawng hi nawl ngeitu tak cu a si. Sihmanhsehlaw, pawngkam um tu ning le thil sining hna cungah “theih hngalh thiamnak  le hmuh thiam nak ttha” kan ngeih a si ah cun Pathian duh ning lam, lam hmaan ah kan kal kho peng ko lai.

Pathian duh ning le a nawl bia hna kha ttha tein kan thieh thiam nak hnga “Kawl” zungzal in, hlen a hmang mi vawlei thil sining hna kha doh khawh i zuam zungzal hna u sih. Thil hmaan mi kawl kan thiam khawh nak hnga ding caah thil a hmaan mi “Pathian Bia” nih a kan cawnpiak mi cungah kan lungthin hahter hna hlah u sih.