Vutcam puai

Joel 2:12-18

2 Cor 5:20- 6:2

Matt 6: 1-6, 16-18

Minung kan nunnak caan a tawi ning cang le hi vawlei cungah hin zungzal in kan nun lai lo ti hngalhter than nak theih hngalhter nak puai “vutcam puai” cu nihin ah hin kan tuah hna. Fale nih zeitluk in nu le pa thin hun ter zongah nu le pa hna cu a kan ngai thiam zungzal tu hna an si. Ngaih thiam kan hal than hna a si ah cun a kan ngaih thiam zungzal ko. Minung cu a kan sertu Pathian duh lo mi lam ah zulh lo in mah duh nak lam le thil tuah a hmang mi kan si tawn. Sihmanhsehlaw, Pathian sin ah sual ngaihchih than nak he kan panh than a si ah cun a kan ngaihthiam zungzal ko. Israel miphun hna zong nih Pathian nawlbia an buar lengmang ko nain an sualnak an i ngaihchih than tikah Pathian nih a ngaihthiam than hna i thluachuahnak a pek tawn hna. Prophet Joel nih: “Ka tlunter lai tiah a timi harnak kha leet i ngaihthiam awk tu ah aa tim zungzal mi a si” tiah a ti. (Joel 2:13)

Mithiang Paul nih a ti ve mi cu: “Ngaihmanh u! Pathian zaangfahnak hmuh caan cu atu hi a si i khamhnak hmuh ni cu nihin hi a si” tiah a ti ve. (2 Cor 6:2)

“Nihin a ti mi le atu” tiah a ti duhnak sullam hi zeidah a si hnga? Minung cu sual ngaihchihnak kan tuah hnu zongah sualnak chungah kan tla thiam thiam ko hna. Sihmanhsehlaw, Pathian zangfahnak cu pe in tah khawh mi a si lo ti duh nak a si. Zungzal in a kan ngaithiam than tu le a kan daw zungzal tu a si fawn. Nihin a si lo le a tu ah hin kan sual kan palh hna nak hna nak caah sual ngaihchih in a sin ah pah than hna u sih. Kan Bawipa vailam cung a thlai lio a thih hlan deuh te ah misual pakhat nih a sualnak aa ngaihchih i zangfah nak a nawl tikah Bawipa nih a leh mi cu: “Mah hihi kan chimh: nihin ah Paradis ah keimah sinah na um lai” tiah a ti (Lk 23:43). Cu a si caah, kan sual kan palhnak vialte Pathian nih a kan ngaihthiam nak hnga ding caah sual ngaihchih nak ngeih in ngaihthiam hal zungzal hna u sih.

Kan tuahser mi a bik in thatnak kan tuah mi hna cungah midang nih a kan theih lo hmanh ah a kan theihthiam piak zungzal tu cu Pathian a si i kan tuahser nak ning in Bawipa nih thluachuah a kan pek. (Matt 6:4,6,18) ah pehzulh in kan hmuh mi cu: “cun a thli tein nan tuahmi a hmutu nan Pa nih laksawng an pek hna lai” tiin voi (3) tiang a ti. Ulhcaan kan phanh cang bangin sumnak lungthin he thatnak tuah kawh i zuam hna u sih. Ulhnak (i sumnak) kan tuah tikah pekchanhnak he kemh ding le thlacam nak in funtom ding a si.

Ulhcaan ah hin kan duhnak i sum hna in kan innchungkhar cio te ah thlacam zungzal hna u sih. Kan rampi ah himnka le daihnak a um khawh nak hnga thlacam zungzal hna u sih.