Zungzal a hman mi Thlacamnak

Nihin kan theih kan rel mi Isaiah Cathiang chungah kan hmuh mi cu:"Ka bia cu van in rung tlami ruah le hawhra bantukin a si lai. Ruah le hawhra nih cun van ah kir than ti loin vawlei kha an hnawnter i thlaici kha an khohter i an thanter i thlaici tuhtu kha rawl an pek hna. Cu bantuk cu ka kaa in a chuakmi bia cu a si ve lai - ka sinah a lawngin a rak kir than lai lo, tuah seh tiah ka fialmi kha a tlolh lai lo i ka thlahhnawh chanmi thli ah khan a tlam a tling lai"  tiah a ti (Is 55:10-11).

Khrihfa kan si hna nak caan zong a sau cang. Bawipa thawngtha bia a phuangtu hna sin in Pathian bia le cawnpiak mi hna kan theih hna nak caan zong a sau cang. Bible Cathiang kan i cawk khawh cio hna nak caan zong a sau cang. Prophet Isaiah nih a chim bangin kan lung chung cio ah hin Pathian bia hi a kho i a thang kho cio cang maw? A khoh cang a si ah cun a thawng i aa dawh mi kung a si cang maw? Antamci tiate tah a si kho cang hnga maw? Bawipa nih: "Antam ci tiate hmanh zumhnak nan ngeih ahcun, hi tlang hi, 'I thawn,' ti u law aa thawn ko lai. Zei paohpaoh kha nan tuah khawh ko lai" tiah a kan ti (Matt 17:20).

Nihin kna theih mi thawngtha chungah Bawipa nih zeitindah thla kan cam hna lai timi fiang tein a kan cawnpiak. Minung cu thlitha le thawngpang tha theih a duh zungzal mi kan si. Kan nih lai mi hna hi inn thluachuah pek nak le thlacam nak kan tuah tik paoh ah siangbawi, pastor te hna le Khrihfa upa, innpa chakthlang hna le sahlah rualchan hna kha kan kawh kan sawm tawn hna i thlacamnak kan tuah ti tawn hna. Cu tikah caantlai tu pa nih thlacam a thiam deuh mi tiah a zumh mi hna kha special thlacamnak caan a pek tawn hna. Mah hi hi kan herh tak tak mi a si maw? Pathian hrimhrim nih a zeilei hmanh in soi awk a um ti lo mi thlacamnak a kan cawnpiak mi hi philh riangmang in minung sining duhning thlacamnak hi a tlaihchan deuh mi kan si sual maw?

Minung sining in palhnak a um thiam. Bawipa nih hi tin a ti: "tukforhnak chungah kan phakter hlah. That lo nak in kan khamh tuah" tiin thlacam ning cang a kan cawnpiak (Matt 6:13). Hi thlat lo nak, tukforhnak hi kan Bawipa hrimhrim nih a intuar cang mi le a ton cang mi an si. Minung sining in tei khawh nak thazang a um lo ti nak zong a si fawn. Zeicah kan ti a si ah cun, bawmh hal nak thlacam nak a si caah a si. Cu caah tei khawhnak thazang le ve hal ding in a kan cawnpiak nak hi a si.

Cusicaah, Bawipa cawnpiak mi thlacamnak hi thla kan cam fatin cam peng ding a si. Minung cawnpiak mi nak in Jesuh Khrih hrimhrim nih a kan cawnpiak mi thlacam nak hi a thianghlim khun i a tling khun fawn. Teinak kan hmuh khawhnak zong a si. Bawipa cawnpiak mi thlacam nak kan cam ruangah zeihmanh ningzah ding a um lo. Midang nih thlacam a kan fial tik zongah a dang zeihmanh kan chim thiam, kan rel thiam lo hmanh ah "Bawipa cawnpiak mi thlacamnak" hi cam ding a si. A tling tuk mi thlacam nak a si. Prophet Isiah chungah kan hmuh bangin: "Ka bia cu van in a rung tlami ruah le hawhra bantuk a si lai. Ruah le hawhra nih cun van ah kir than ti loin vawlei kha an hnawnter i thlaici kha an khohter i an thanter i thlaici tuhtu kha rawl an pek hna. Cubantuk cu ka kaa in a chuakmi bia cu a si ve lai - ka sinah a lawngin a rak kir than lai lo, tuah seh tiah ka fialmi kha a tlolh lai lo i ka thlahhnawh chanmi thil ah khan a tlam a tling lai".