Pathian riantuan tu hna Thimnak

Nihin ni i ruah ti ka duh mi cu Jesuh Khrih hnu zultu hna nih Bawipa thawngtha bia a karh chinchin khawhnak hnga ding caah zeitin dah khua an khan ti mi kong hi a si. (Acts 6:1-7) chung kan zoh tikah Jesuh Khrih Thawngtha bia a cohlang veve ko mi hna Greek mi hna le Judah mi hna karlak ah thleidannak le siknak a hung um tikah lamkaltu hna nih bu chungah daihnak a um khawh nak hnga ding caah khua an khan. Greek mi hna le Judah mi hna hi an nunphung zong aa lo lo mi an si. Sihmanhsehlaw, Jesuh Khrih thawngtha bia an cohlaan nak ah hin cun pakhat sining dirhmun in a dir mi an si. Ruah ding a um mi cu “An cohlaan mi thawngtha bia nih thlarau khamhnak a pek khawh ko hna a si ah cun an kar lak i dawnkhantu thennak lungthin in khan lung khahnak le hmunkhat tein dirter khawh ti nak cu a pek khawh tuk ko hna lai.”

Lamkaltu hna nih an chimmi cu: “Kannih nih Pathian bia chim kha thlahdorh riangmang i tangka i phawtnak kong lawng kha kan tuah ahcun ahmaan hnga lo. Cucaah u le nau hna, nan lakah Thiang Thlarau le fimnak in a khat tiah nan hngalhmi pasarih in thim hna u law, cu hna cu hi thil a tawlreltu ah kan thiah hna lai. Kannih tu cu thlacam le Pathian Bia chimnak ah khan kan caan cu a dihlak in kan hmang ko lai,” tiah an ti (Acts 6:2-4).
Lamkaltu hna nih an chimmi cu an dihlak in an lung a si i cucaah zumhnak le Thiang Thlarau in a khatmi Steven, Filip, Prokhoras, Nikanor, Timon, Parmenas le Antiok khuami Jentail mi Nikolas, Judah phung a zulmi kha an thim hna. Cu hna cu lamkaltu hna sinah khan an hei chuahpi hna i thla an campiak hna i an lu cungah an kut an chuan.

Cuticun Pathian bia cu a karh chin lengmang. Jerusalem khua chungah khan a zummi cu an tam chin lengmang i tlangbawi tampi zong nih cu zumhnak cu an pom ve.

Cu caah dawtmi u le nau hna, kan nunnak ah hin Pathian rian le vawlei rian timi hi tha tein a thlei dang thiam tu si khawh i zuam hna u sih. Mithiang James nih: “Nuhmei ngaktah tha tein zohkhenh le vawlei cungah thurhnawm lo tein um tu hi Pathian kan Pa nih biaknak thiang le biaknak taktak i a ruahmi cu a si” tiah a ti (James 1:27).