Tuukhal Tha Jesuh

Voikhat Bible relnak ------- Lamkaltu 4:8-12
Voihnih Bibl relnak -------- 1John 3:1-2
Thawngtha Bia relnak ---- John 10:11-18

“Tuukhaal tha cu keimah hi ka si”
Dawtmi u le nau hna nihin cathiang kan rel mi chungah Bawipa nih: “Keimah cu Tuukhaal tha ka si” tiah a ti. Kan nih kan um nak ram Kawlram chungah hin cun Tuu kong he pehtlai in tam kan thei theng man hna lai lo. Zeicah kan ti a si ah cun kan ram chungah hin kan zuat tuk hna lo caah a si.

Tuu timi cu a nun a nem i a dang satil hna le saram hna he an i lo hna lo. A hrut ngai kan ti lai cu. Cu a si caah tuu hna an him nak ding le an dam khawh nak hnga ding caah, tuukhaal pakhat dirhmun le thinlung hi a biapi ngai mi a si. Tuukhaal nih tha tein a zohkhenh hna a si ah cun tuu hna zong an paw a khim i an ngan a dam.

Kan nih minung hna zong hi tuu hna bantukin a hrut ngai mi kan si ve hna. Sualnak hna kha sualnak an si ti theih lo, palhnak hna zong palhnak an si ti theih lo in sualnak chung le palhnak chungah kan tla leng mang tawn. Hi thil vialte hna hi Pathian tluk deng in a fim mi le thil a thei mi Satan nih a kan hlen khawh tuk caah a si. Tuukhaal a um lo mi tuu hna bantukin rawhral nak lei tu ah hin kan panh leng mang tawn.

Bawipa nih: “Keimah cu Tuukhaal tha ka si” tiah a timi hi a sin ah panh dingah a kan sawmnak a si hlei ah Amah sin lawngah hin himnak le khamhnak a um ti nak zong a si. Tuukhaal tha a si mi Bawipa hnu kan zulh a si ah cun, ram hinghno ram tha, zungzal nun nuamhnak Vancung ram lei ah ding theo in a kan kal pi lai i him te in kan phan kho hna lai. Tuukhal tha Bawipa Jesuh sinah panh zungzal hna u sih.