Dawtnak cu Pathian sin in a ra mi a si.

Pakhat le pakhat kan i dawtnak le kan i hawikomhnak hi zeitin dah aa thawh. Cun Pathian kan dawtnak le kan i pehtlaihnak hi zeitluk in dah a thawn? Bawipa Pathian nih a nawl a kan pek bangin Pathian cung le midang cungah kan daw kho hna maw?

Bawipa nih a kan dawtnak cu Pa Pathian nawl ngai in tangdornak lungthin he a kan dawt zungzal. Kan nih hna zong Pathian dawtnak cotlak mi kan si duh a si ah cun Pathian dawtnak chungah hin tangdornak lungthin he a nawl kan zulh zungzal awk a si. Midang hna sin in dawtnak co kan duh ve a si ah cun tangdornak lungthin he i pehtlaih in i dawt awk a si. Zeicah kan ti a si ah cun tangdornak lungthin nih zeizong vialte a tei khawh caah a si. Pathian dawtnak kong he pehtlai in mithiang John nih hitin a ti:

“Ka fale hna, dawtnak hi Pathian sinin a rami a si caah pakhat le pakhat i dawt u sih. Pakhat le pakhat aa dawmi cu Pathian fa an si i Pathian kha an hngalh. Pakhat le pakhat aa daw lomi nih cun Pathian kha an hngal lo, zeicahtiah Pathian cu dawtnak a si”(1Jn4:7-8).
Zultu hna nih Jentail Khrihfa hna sin ah Barsabbas le Silas an thim hna(Acts 15:22) i thawngtha bia chim dingah an thlah mi hna zong hi, Jentail mi hna zong nih khamhnak co ve hna seh tiin dawtnak lungthin he an thlah hna hi a si.

Bawipa hrimhrim nih: “Nawl kan pekmi hna cu hihi a si: pakhat le pakhat i daw u,”(Jn 15:17) tiah a ti.

Cu a si caah a hmun mi dawtnak a si mi Pathian sinah um zungzal hna u sih, innpa, hawikom hna cung zong ah tangdornak lungthin he dawt khawh i zuam zungzal hna u sih.