Kan i ruahchannak Bawipa

Bawi Jesuh Khrih cu Siangpahrang vialte lak ah Siangpahrang bik, hruaitu vialte lakah hruaitu tha bik, kan caah hnemtu tha bik le zungzal daihnak a kan pe kho tu a si.

Ram lian ram sang a um mi hruaitu hna nih a zei lei hmanh in an tluk khawh lo mi cu Bawipa Jesuh hi a si. Vawlei mithmuh ah a fiam a thiam ti mi hna nih khamhnak a kan pe kho hna maw? A kan pe kho tu an um hrimhrim rih lo.

Buaibainak tampi nih a kenkip lo in hna hnawhnak a kan pek cio. Covid-19 pulzawtnak siseh, ram chungah kah dohnak hna nih chun zan thlalau in a kan tuah cio. Ahohmanh a him mi kan um ti hna lo. Tihphannak nih a kan kulh dih cio cang hna.

Chawva lei in thiam sang hna nih kan vawlei pi ah hin mi kip pawkhim ding in an tuah khawh dih lo bangin, ram uk nak lei kap in thiam sannak a ngei mi hna zong nih ram chungah daihnak taktak an chuah pi kho cio hna lo. Midang ram chim lo mah ram chung hmanh ah thil ti khawh nak thazang a der tuk cio ko hna.

Sihmanhsehlaw, kan biakmi kan Pathian cu kan zeizong vialte a si bantuk in kan zeizong te hna hi ap hna u sih. Mah thawnnak thazang cung lawng ah bochannak ngeih lo in Pathian thawnnak cung tu ah hin mah le i ap in zumhnak he neih hna u sih. Pathian pakhat lawnglawng hi kan daihnak, kan thawnnak le kan him nak cu a si.

Keimah thawnnak timi lungput hi Pa Pathian zong nih a duh mi a si lo. Cu bantuk lungput Satan sinin a ra mi a si i Pathian ruah ning he aa ralchan mi a si. Minung thawnnak lawng bochan loin Pathian sin thlacam bu in mi vialte caah rian a tuan mi hna zong nih teinak an hmuh khawhnak hnga, Pathian thluachuah nih a um pi zungzal hna nak hnga thlacam piak peng cio hna u sih.