Khrihfa Hna Nunzia

Minung a si mi paoh cu pakhat le pakhat kan i bomhnak thawng lawng in hin teinak kan hmu kho hna. Hngakchia siseh, bawhte siseh, nu le te an siloah pakhat khat bawmhnak lawngin an ei i an kal thiam. Fimcawnnak lei zongah bawmtu saya/ma te kan herh zungzal ve hna. Taksa ca i riantuan nak zongah caan i lak hnu lawngah hawi bangin tuan thiam a si ve. Thlarau lei zong in cu ti thiamthiam in a si ve.

Nihin cathiang kan rel mi chungah biachim a thiam ngaingai mi Apollos kong kan theih. Zeitluk hmanh in phungchim thiam ko hmanh sehlaw, bupi zumhnak le cawnpiak nak hna kha tha tein a theih lo tikah “Prisilla le Aquila nih an inn ah an kalpi i Pathian Lam kong kha hmaan deuh chin in an cawnpiak” (Acts 18:26). Khrihfa kan nunnak ah hin pakhat le pakhat i zohkhenhnak le i thithruainak hi a um zungzal ding a si. Vawlei mithmuh in “Keimah nak in a thiam deuh sual lai, a ngei deuh sual lai, a thangcho deuh sual lai” timi lungput ngeih loin; “kei caah thatnak a si ah cun ka hawi ca zongah si ve seh, Van ram ah a kai ding ka si ah cun keimah lawng siloin ka hawi le tampi he kai ti hna u sih” timi lungput hi kan ngeih ding a si.

“Biatak kan chimh hna: Ka Pa nih ka min in nan halmi paoh cu an pek hna lai”(Jn 16:23) tiah Bawipa nih a kan ti. “Ka min in” tiah Bawipa nih a chim duhmi sullam hi tha tein kan ruah le kan theih a herh. Khuate lei ah NGO min in khual ka tlawn a si ah cun NGO phung ning in ka kal a hau. Phungchimtu dirhmun in ka kal a si ah cun phungchimtu dirhmun in kan um a hau. Min le nawl ngeihnak kan ngeih mi nih hin rian tampi a tuan khawh bantukin "chim haulo mi bia" hna zong tampi a langhter khawh.

Jesuh Khrih nih “Ka min in” tiah a kan ti tikah a kan duh piak mi cu “Amah aiawh ding hi a si”. Jusuh hmuh ning in hmuh ve, ruah ve, thil tuah ve ding hi a si. Jesuh bantukin kan nun i Pa Pathian sinah thla kan cam, kan duh mi kan hal ve hna a si ah cun Pa Pathian nih a kan pek ve hrimhrim ko hna lai. Khrihfa a si mi paoh nih thla kan cam tik caan paoh ah a donghnak i kan hman theo tawn mi biafang cu “thihnak in a tho than mi kan Bawipa Jesuh Khrih min in kan in hal” timi hi a si. Jesuh Khrih min cu kan herh zungzal ko hna. Sihmanhsehlaw “A min nunpi” kha Bawipa nih a kan duh piak deuh mi a si.

“Jesuh min in” nun khawh i zuam cio hna u sih.